Шоланы бириси Къыбла Корея булангъы биринчи оюнну бизин команда гьаран-гьаран тенг санавгъа ойнама бажарды. Гьаран-гьаран деп айтагъаныкъ, вратарыбызны янгылышындан оюнну бир гьавур утдуруп да турдукъ. Кёп макъталгъан себепденми яда оюнгъа тийишли даражада гьазир болмагъанмы, вратарыбыз И.Акинфеев бир де болмагъандай осал ойнады. Оюнну узагъында бизин къапугъа урулгъан топланы бирисин сама мекенли тутуп бажармады. Эки керен ол къакълыкъдыргъан топну Кореяны чапгъынчылары бизин къапугъа гийирме аз къалды. Гол болгъан гезик чи Кореяны бир чапгъыныны вакътисинде 30 метрлерден урулгъан, тувра оьзюне гелеген топ ону къолларындан къакълыгъып къапугъа гирди.
Оюнну экинчи яртысында команданы баш тренери Ф.Капелло А.Дзагоевни ва А.Кержаковну ойнама чыгъарды. Бизин команда гийирген къайтарыш топну шо эки де футболист онгарды деп айтма ярай. Оланы запасда сакъламакъны не себеби болгъан экен?
Оюн битгенде баш тренер командагъа баракалла билдирди. Озокъда, тренерни, футбол касбучуну англаву бардыр. Амма оюнгъа телевидениеден къарагъанланы чы команданы оюну рази къалдырмагъаны гёрюне.
Гелеген оюнну Россияны командасы 22-нчи июнда Бельгияны командасы булан ойнай.
А.ГЬАМЗАЕВ.
СУРАТДА: къайтарыш топну гийирген А.Кержаков.
