Бир гюн Каспийск шагьаргъа бармагъа тюшдю. Къуллугъум битген сонг умуми орта билим береген 3-нчю школаны къырыйында маршрутканы къаравуллап токътагъанман. Шо вакъти бир жагьил де гелип эретурду. Гийинген кюю гёрмекли: къара курткасы, янгы спортивный шалбары, бухари бёркю.
Бир минутгъа ювукъ эретургъан сонг, кисесинден «Мальборо» папирос къутукъ чыгъарды ва оьзю уьйренген кюйде чертип, бир папирос алды. Сонг, магъа багъып бурулуп:
– Агъав, папирос къабуздурмагъа спичка бер, – деди.
– Мен папирос тартмайман, шо саялы спичка алып юрюмеймен, – дедим. Шо жагьил масгъыллайгъандай къарады да:
– Эконом этесиздир, – деп, оьзтёрече иржайды.
– Сен де спичканы эконом этегенге ошайсан, – дедим.
– Спичка алып айланмайман, – деди. – Сав гече къурдашымда турдум. Зажигалкамны да унутуп чыкъгъанман, – деди ол.
– Къайсы класда охуйсан? – деп сорайман.
– Не къайсы класдадыр? – деп гётеринкли жавап бере. – Мен еттинчи класдан тайгъанман школадан. Гьали охув не пайда бере? Мен таныйгъан оьр билими барлар 8–10 бар. Бирини де иши ёкъ.
– Сагъа нече йыл бола? – деп сорайман.
– Узакъ къалмай 17 йыл болажакъ.
– Атынг?
– Магьаммат… Мага, – дей улан.
– ПТУ-гъа сама тюшген бусанг…
– ПТУ-гъа лапшаедлер тюше, – дей улан.
– Бай гийиминг бар, багьалы папирос тартасан. Акъча ким бере?
– Анам бере.
– Атанг не ишлей?
– Атам Россиягъа гетгенли эки йыл бола.
– Он етти йыл битеген улан анангны елкесинде турмагъа уялмаймысан?
– Эчки уялсын бары ери гёрюнеген.
– Сав гече, гюн боп-бош турамысан?
– Тенглилерим булан оьтгеремен, боевик кинолагъа къарайбыз, ичип де йиберебиз.
– Узакъ къалмай армиягъа да чакъырар сени. Армиягъа да гьалиги девюрде билимли уланлар тарыкъ.
– Сиз адашгъанмысыз, агъав? – дей улан.
– Армиягъа билимлилер барсын, магъа мунда да яман тюгюл.
Армиягъа чакъырса, адашгъан болуп топуракъда авнарман, тилимни унутарман.
Маршрутка 40 минутдан гелди.
Токътагъандокъ, улан ачылгъан эшикге багъып чапды ва бары да минегенлерден тез машинге минип олтурду.
Мен «Бекенез» дейген ерде тюшмеге герек эдим. Эшикге ювукъ болагъанда, ерлешип олтургъан Магьамматны, Маганы гёрдюм. Огъар ювукъда 55–60 йыллыкъ бир къатын сумкасын да тутуп эретургъан эди, олтурмагъа ер ёкъ саялы.
Автор: Магьамматбек Османов.
