Айлана якъдагъы экономикасы оьсген пачалыкълар гьар тюрлю сепбеплеге гёре Россиягъа къаршы санкциялар билдиргени саялы, тышдан гелтирилеген малланы ва этилеген къуллукъланы орнуна ерли продукцияны оьсдюрювге ва шолай да яшавлукъ учун тарыкълы гьар тюрлю онгайлыкъланы болдурувгъа савлай уьлкебизде йимик, арт вакътилерде бизин аграр республикабызда да айрыча тергев бакъдырыла. Озокъда, шогъар байлавлу болуп базарларда ва сатыв-алыв тармакъны тюкенлеринде малланы ва къуллукъланы багьалары артагъаны да ачыкъ болуп гёрюне.

 

Къоллавчулар учун лап да тарыкълы сурсат малланы багьаларын гьатдан озмагъа къоймай, ёрукълу кююнде сакъ­ламакъ учун чаралар гё­рюле. Дагъыстанны Гьукуматыны янында ва шолай да республикабызны бары да муниципал къурулувларында шону учун къыставуллу гьалланы алдын алмакъ муратда хас штаблар къурулгъан ва иш гёре. Штабны ортакъчылары багьаланы артывуну алдын алывда асувлу чаралар гёре десек де, дурус болмас.

Оьтген март айны ичинде багьалар некъадар артгъан? Шо гьакъда ДР-ни промышленност ва сатыв-алыв минист­рини биринчи заместители Рашит Мурзаев «Ёлдашны» охув­чуларына баянлыкъ бере.

– Гертиден де, Дагъыстан Россияда аграр республика гьисапда танывлу. Шогъар да къарамайлы, март айда, белгили себеплеге гёре, ашамлыкъ малланы багьалары артгъаны саялы, айлана якъда къыставуллу гьалланы тувдурду. Магъа да респуб­лика оьлчевде къурулгъан ва иш гёреген штабны ортакъчылары булан бирче республикабызны муниципал къурулувларындагъы ва тахшагьардагъы базарларда тергевлер булан болмагъа тюшдю. Яшырмагъа тарыкъ тюгюл, шекерни багьасы март айда 20 процентге гётерилди. Неге десегиз, шекерни бир къадары гьали болгъунча Россиягъа йимик бизин регион­гъа да тышдан гелтириле эди. Дагъыстанда шекер этеген ер де ёкъ.

Унну багьасы артгъаны саялы, экмекни багьалары да башгъа-башгъа муниципал къурулувларындагъы базар­ларда ва тюкенлерде 3-5 процентге гётерилди. Къапустаны гьакъында айрыча эсгермеге герек.

Акъуша, Дербент, Лаваша районларда къапуста оьсдюрюле ва мадарлы тайпаланы гьаракаты булан сакълавгъа салагъан ерлери де бар. Бугюнлерде де шонда Санкт-Петербургдан, Москвадан ге­лип къапустаны арачылар ломайлап килосун 60 манатдан алып гетегени белгили. Шону учун къапустаны багьасы увакълап сатылагъан ерлерде килосу 100 манатгъа чыгъагъан гезиклери де болду. Шо кюйде оьзге тюрлю сурсат маллар да арт вакътилерде ерли алывчулар учун учуз токътамай.

Шону алдын алмакъ муратда штабны ортакъчылары, тергевлени натижаларына кюрчюленип, багьаланы ёрукълашдырывну ёлларын ахтара ва танглай. Сурсат къыт болмаса, озокъда, багьалар да «хапмас». Дагъыстанда буса гьалиги заманда сурсат къытлыкъ ёкъ. Дагъысын айтмагъанда, Дагъыстанда гьар йыл 1 миллион 500 минг тондан да кёп авлакъ ниъматлар ва гьар тюрлю емишлер къайтарыла. Гьайванчылыкъ тармакъда да гёрмекли натижалар къолда этилине. Шону учун гележекде де юрт хозяйство къуллукъчуланы, сабанчыланы гьаракатын гьи­сапгъа алып, олагъа пачалыкъ харж булан кёмек этмеге токъташгъаны да инамлыкъны тувдура.

Чачыв майданланы генг­лешдирив, емишлер, овощлар оьсдюрюв булан машгъул тайпаланы иштагьландырыв, гьайван-мал сакълав булан доланагъанланы талаплары­на къол ялгъав булан гележекде де пачалыкъны ва халкъны сурсат аманлыгъын болдурувгъа арт берилмежек. Гьалиги заманда буса бизин республикабызны муниципал къурулувларында йимик, тахшагьарыбызда да юрт хо­зяйство ярмакюлени оьтгерив багьаланы ёрукълашдырмакъ учун пайдаландырыла.

Ери гелгенде эсгермеге сюе­геним, апрель айны ахырында да, башларында йимик, Магьачкъалада дагъы да уллу юрт хозяйство маллар сатылагъан ярмакю оьтгерилежек.

Оьтген ярмакюде йимик Ораза байрамны алдында оьтгерилеген ярмакюде де агропромышленный комп­лексни оьсюмлюкчюлюк ва гьайванчылыкъ тармакъларында оьсдюрюлеген продукциягъа салынагъан багьа­лар алывчулар учун бир къа­дар учуз токътажакъ.

Май-июн айларда буса юрт хозяйство продукция ал­­дагъы йылларда йимик, базарларда эркин болажакъ ва багьалары да ёрукъгъа тюшежеги шекликни тувдурмай.

 

Гьазирлеген

Къ. КЪАРАЕВ.