Бырынгъы заманлардан берли Ватангъа къоркъунчлукъ тувса, эренлер къолуна савут алып, ону аманлыгъын сакъламагъа бир гёнгюлден тургъанлар. Къумукъланы тарихинде шолай агьвалатлар кёп болгъан. Санлар да сёгюлген, къанлар да тёгюлген, амма бизин уллаталарыбыз бир де намарт душмангъа ёл бермегенлер, гьаман да бетге-бет ябушгъанлар. Ана-Ватаныны эркинлиги учун ябушгъан къумукъ уланланы къоччакълыгъы халкъ авуз яратывчулугъубузда да айрыча ер тутгъан.
Ватаныбызгъа бугюн де къоркъунчлукъ тувгъан, бугюн де ону ёкъламагъа, гесеклеге бёлюп, дюньяны картасындан ёкъ этмеге къарайгъанлар бар. Демек, биз бугюн де, бай тарихибизни гёрмекли заманларында йимик, гьали де бирикмеге, душман булан бетге-бет ябушмагъа герекбиз. Шондан бизин де, бизин авлетлерибизни гележеги де гьасил болмагъа бола.
Сентябр айны 21-нде Россияны Президенти Владимир Путин савлай уьлкеде ватанны якълавчуларын гене асгерге чакъырагъанны билдирди. Шо гюн Бабаюрт районну военкоматында да къыставуллу ишлер башланды. Асгерге чакъырылмагъа гереклени сиягьлары этилди, юртларда военкоматгъа чакъырып, Ватаныны алдындагъы борчун кютмеге гереклеге повесткалар пайланды.
Озокъда, ахырынчы гезик шо гьал уьлкебизде 80 йыл алда болгъангъа гёре, йиберилген хаталар да болмай къалмады. Авлетин давгъа йибермеге бир ана да сюймей. Шолайлар булан питнечилер пайдаланмагъа сюйдюлер. Ерли гьакимлени, военкоматны ва ич ишлер къурумланы къуллукъчуларыны къастлыгъы булан гьалны ёрукъгъа салмагъа бажарылды.
Къумукъларда «эр уланлар уьйде тувар, къырда оьлер» деген сёзлер бары негьакъ тюгюл. Мен оьрде де эсгерип гетгеним йимик, оьзюн Ватаныбызны патриотуна гьисаплайгъан гьар эркекни сыйлы борчу – тарыкъда Ватаныбызны аманлыгъын болдурмакъ, ожагъынуьюн якъламакъ. Шолайлар Бабаюрт районда да кёп бар ва олар мобилизация башлангъан биринчи гюнден тутуп, оьзлер военкоматгъа да гелдилер, гёнгюллю кюйде асгерге гетип де туралар.
Болагъан зат, сандыкъгъа гирип яшынсанг да бола. Шону яхшы англап, гёнгюллю кюйде асгерге чакъырылгъанланы арасына оьзюню атын Геметёбе юртну башы Къураш Гьажигишиев де язды. Ватанына къопгъан къарагюн ол уьюнде парахат ятып болмады. Ону йимик гьасанайлы къоччакъ уланлар, уьч ювукъ Хайрутдин Истанбуловну, Сайпулла Терикмурзаевни ва Тимур Дойналиевни атларын да айрыча эсгермеге тюше.
Сонг да, Донбасда болуп турагъан агьвалатларда оьзюню асгерлик борчун кютеген вакътиде, яраланып уьюне къайтгъан, язылгъан дыгъары битген буса да, мобилизация башлангъан гюн, повестка алып, гене ватандаш борчун кютмеге Адил Янгыюртдан гетген прапорщик Шарабдин Исакъовну къоччакълыгъы да макътавгъа лайыкълы. Олайлар оьсюп гелеген яш наслугъа къоччакълыкъны ва патриотлукъну, Ватаныбызгъа ва халкъыбызгъа бакъгъан тенгсиз сюювню жанлы уьлгюсю болуп токътамагъа гереги гьакъ зат.
Шолай болажакъгъа да шек ёкъ. Неге тюгюл де, биз бугюн бизин якълы уланлар Уллу Ватан давну йылларында гёрсетген къоччакълыкълардан уьлгю ала оьсгенбиз ва шо меселде авлетлерибизни де оьсдюрмеге борчлубуз.
