Инг башлап йыракъдан гелген къонакъланы Къарабудагъгент районну администрациясыны башчысы ва ону заместителлери къаршыладылар. Оланы сапарыны мурады булан таныш болгъан сонг, район администрациясыны башчысы Агьмат Гьажиев айтгъан сёзлеге гёре, музыканы бары да миллетлени вакиллерине англашылагъан тил булан тенглешдирме ярай. Ол дагъы да къонакълар къумукъ фольклорну байлыгъын исбат этеген материал жыйып болажагъына ва шо ахтарывлар къардаш тюрк халкъланы илмусуна уллу къошум этежегине умут этегенин англатды.
Ёлугъувда ортакъчылыкъ этеген администрациясыны башчысыны заместителлери Асадулла Гьажиев ва Имамитдин Агьматов гелген къонакълагъа разилигин билдирдилер ва олар пайдалы ишлеп болсун учун бары да шартлар яратылажакъны англатдылар.
Сонг мажар илму ахтарывчулар муаллим-ахтарывчу Хосар Хосаров ва ерли телевидениени къуллукъчулары булан бай тарихи булангъы Гьели юртгъа сапар чыкъды. Онда олар биринчилей Имьямин Халимбековну уьюне ёл тутдулар. Уллу чагъына да къарамайлы, усталыгъын тас этмеген гьюрметли тамаза агъачкъомузда бырынгъы къумукъ кюйлени согъуп, ону къызардашы Кюсюм Халилова буса бырынгъы къумукъ сарынланы, йырланы уста кюйде айтып, къонакъланы разилигин къазандылар.
Мажар къардашларыбыз шо гюн Дагъыстанны ва Темиркъазыкъ Осетияны халкъ артисти Шавлух Ибадуллаевлени агьлюсюнде де къонакълай болдулар. Къумукъ милли музыканы, бийивлени, герти усталары Шавлух агъай ва ону уьягьлюсю Анав Ибадуллаева гьаман да йимик, гелген къонакъланы шат кюйде къаршылады. Бютюн яшавун маданият булан байлагъан агьлю илму ахтарывчуланы кёп тюрлю макъамлар, йырлар булан таныш этди. Олар йырлагъан йырланы арасында такъмакъ йырлар да, къакъакъ йырлар да, сююв сарынлар да, игит йырлар да бар эди.
Гезикли ёлугъув учун къонакълар Гьели юртну орта школасына гелдилер. Кёп йылланы узагъында уьстюнлю кюйде иш гёрюп турагъан агъачкъомузчуланы ансамбли согъуп, олагъа дагъы да материал топлама имканлыкъ берди. Ансамблни ёлбашчысы Заманагъа Агъаев, оьзю де бир нече макъамлар согъуп, къумукъ музыканы тюрлюлюгюн гёрсетеген йыр йырлады.
Пагьмулу къомузчу яшланы алдында къонакълар да борчлу къалмады. Кёп тюрлю музыка алатларда уста кюйде ойнап бажарагъан Гергел Агоч, мажар милли кюйлерин согъуп, яшланы да, ёлугъувну ортакъчыларын да тамашагъа къалдырды.
Шо гюн илму ахтарывчулар оьзлер жыйгъан материалгъа гёре къумукъ фольклорну байлыгъына тюшюнгенин айтдылар.Оланы сёзлерине гёре, къумукъ юртларда жыйылгъан макъамларыны кёбюсю мажар макъамларына бек ювукъ, бирлери чи бютюнлей рас геле. Шо бирдагъы керен бизин халкъларыбызны тарихде ортакъ къысматы болгъанны исбат этеген аламат болуп токътады. Гергел Агоч бу ахтарывну натижалары Мажарстанны илмусунда уллу иш болажагъына сююнегенин англатды.
Гергел Агоч ва Давут Шомфай Къара бу сапарны яшавгъа чыгъарма къол ялгъагъанлагъа, Къарабудагъгент районну бары да халкъына баракалласын билдирди. Олар энниден сонг да къардаш аралыкъланы уьзмежегине, бу тармакъда илму ахтарывларын узатажагъына сёз бердилер.
Р. МУСАЕВА.
СУРАТЛАРДА: (онгдан солгъа)
И. Халимбеков, К. Халилова,
Г. Агоч; Ш. Ибадуллаев Агоч булан.
Автор чыгъаргъан суратлар.
