Хасавюрт районну Гьажимажагьатюртунда 225 хозяйство бар, адамланы санаву 1200-ден бираз артыкъ. Юрт гиччи буса да, уллу масъалалар чыкъмай къалмай. Мен уллу ёлдан юртгъа гирип барагъанда, машинимни чонкълардан къача туруп гьайдадым. Олар да шагьмат къайдада бузулгъан, тек усталыкъ этсенг, машинни бузмай оьтюп боласан. Гьажимажагьатюртну администрациясыны башчысы Сайитбек Абдулбековгъа берилген биринчи соравум да шо ёлну гьакъында болду.
– Шо ёлну гьалындан оьзюбюз де уялабыз. Гьар йыл бир нече керен грейдер гьайдап тюзлейбиз, бир янгурдан сонг шо алдагъы гьалына тюше.
Эгер де шо ёл район администрацияны гьисабында болгъан буса, гьал башгъа болар эди. Ёлну юртгъа гиргенчеги ерине Дагавтодор жаваплы, Гьалны англатып нечесе керен кагъызлар да язгъанбыз, тек гьал шо кююнде къалып тура. Мисал этип юртну ичиндеги орамланы айтсам, гьалны районну башчысы Жамболат Салавовгъа билдирдим. Алдындагъы йыл юрт школагъа гелеген ярым чакъырым орамны асфальт этди ва школа бойгъа светофор салынды. Бу йыл буса, межитге барагъан 1 чакъырымгъа ювукъ орам асфальт этилди. Шону учун огъар юртлуланы атындан баракалласын билдирме сюемен.
– Юртдагъы налоглар булан да бир-бир ишлени этме бажарыла чы…
–Налог жыйыв юртда яман юрюлмей. Топуракъ налогну 150 минг, мал-матагьгъа буса 100 минг манат жыйма герекбиз. Гьар йыл гёрсетилген планларыбызны толтурабыз. Гьали транспорт налогну да юртлагъа къоя. Шоланы да бир ёрукъгъа салма къарап турабыз. Оьзюбюзню харжыбыз булан биз юртдагъы масъалаланы чечебиз. Мисал этип айтсам, гетген ва алдындагъы йылларда юртдагъы бары да трансформаторланы алышдырдыкъ. Янгур явса яда ел чыкъса, адамлар токсуз къала эди, гьали гьал къолайлашгъан. Бу йыл ток теллени де алышдырып болсакъ, дагъы да яхшы болар эди. Сёз ёругъуна гёре айтсам, шо теллер 1965-нчи йылда тартылгъан кюйде.
Гетген йыл Россияны тюрлю-тюрлю ерлеринден гелип, «Росэнергону» вакиллери районну ичиндеги ток багъаналардан башлап, теллерине ерли тергеп гетди. Шолар бары да кемчиликлени гьисапгъа алды. Гезик булан юртларда ишлеп, тарыкъ ерлени алышдыражакъ деген хабар да болду. Шолай болса чы, ток теллеге деп гьазирленген харжны башгъа масъалаланы чечмек учун къоллар эдик.
Шолай да, оьтген йылда юртдагъы газ шкафланы алышдырдыкъ ва ярашдырдыкъ, быргъылар тартдыкъ, гьали юртда яшайгъанлар барысы да газ ягъа.
– Юртда не идаралар ишлей?
– 150-ге ювукъ яш охуйгъан школа, уллу чакъындагъылагъа къарайгъан центрны бёлюгю, 3 адам ишлейген медпункт, маданият къала ва администрация. Юрт гиччи экенге, почтабыз ёкъ, шо ишни Боташюртдагъы почта кюте, МФЦ-ни къуллукъларына да адамлар шонда бара. 1996-нчы йыл болгъанча, биз Боташюрт юрт советни гьисабында тургъанбыз. Шо йылдан берли айрыбыз. Юртубузда 7 депутатыбыз да бар.
– Бирдагъы тамаша этген зат – юртда уллу клуб барлыгъы…
– Алда клубубуз юрт межитде ерлешген болгъан. Клубну директору болуп Уллу Ватан давну ортакъчысы Мамаш Багьавов ишлеген. Ол Краснодар крайда кульпросвет школаны битдирген, юртда драмкружок къуруп, юртлуланы къуршап, кёп спектакллер гёрсетип тургъан.
Гючлю ер тербенивден сонг клубгъа яхшы зарал бола. Сонг конторда китапхана ачыла. 1980-нчы йылларда Т. Тотурбиевни сиптечилиги булан юртда уллу клуб къурула. Бугюн шонда администрация ва китапхана да ерлешген, клубубузда район оьлчевдеги фестиваллар ва конкурслар да оьтгериле.
– Мен сизин юрт агьамиятлы программалагъа гирген деп эшитмегенмен… Шо иш неге юрюлмей?
– Нече йыл да бола биз шо программалагъа ва проектлеге гирме къарайгъаныкъ. Тек программалагъа юртда яшайгъанланы санаву 1 мингден кёп буса къоша. Бизин юрт 2010-нчу йылдагъы гьисап алывда 822 адам бар эди. Шондан берли юрт шайлы артгъан ва 1200-ге етишген. Бу йыл адамланы гьисабын алывдан сонг программалагъа гирме боларбыз. Этме сюеген ишлерибизни кагъызлары гьазирленип битгенни де айтып къояйым.
Биз Юртхозяйство министерликни «Юртларда яшав гьалланы яхшылашдырыв» деген программасына гёре чёплюклер учун 5 ерде майданчалар гьазирлеп битгенбиз. Юртда ичеген сув масъала да бар эди, оьтген йылда юртдагъы сув быргъыланы да алышдырдыкъ. Гьал бираз къолайлашды, тек 1973-нчю йылда бурав урулуп чыкъгъан сувну гючю осаллашгъан. Шолай да, гетген йыл юртда имарат къурулуп, гьали юртлу яшлар шонда гелип спорт булан машгъул болма бола.
– Эсгерилген программалагъа гирсегиз, не ишлер этгенни сюер эдинг?
– Янгы школа, яшлар баву, ёллар, парк, спорт зал тарыкъ, юртну ортасындагъы кёпюрню ярашдырмагъа ярар эди…
– Кёпюрге де не болгъан?
– Ямансув йыллар булан агъа туруп, орну кёп теренге тюшген. Гьали эки де ягъасы чёге туруп, юрт къабурлагъа да етишген, кёпюрню тюбю де ачылгъан. Эгер де шо бузулса, адамлагъа бек онгайсызлыкълар тувулунажакъ. Шону учун да, алдынлыкъ этип, гьалны билдиргенмен.
– Умутларынга етишме насип болсун!
– Савбол!
Бизин маълумат:
Сайитбек Шарабдинович Абдулбеков 1969-нчу йылда Гьажимажагьатюртда тувгъан. Юртда сегиз, Боташюртда он класны битдире ва Новочеркасск шагьардагъы технология техникумгъа тюше. 1987–1989-нчу йылларда Афгъанистанда интернационал борчун кюте. Кёп йыллар Хасавюрт районну ич ишлер бёлюгюнде ишлеп тура ва отставкагъа чыгъа. Ол афгъан медаллар, ич ишлерде ишлейген заманында гёрсетген къоччакълыгъы учун «Къоччакълыкъ» деген орден булан савгъатлангъан. 2011-нчи йылда Гьажимажагьатюрт администрацияны башчысы болуп сайлангъан ва бугюнлеге ерли ишлеп тура.
