Кёп олтуруп турагъан иш, енгил азыкъ ва гьалиги оьзге онгайлыкълар кёплени бюйреклерине яда оьтюне ташлар битеген эте. Шо аврув адамланы бек талчыкъдыра, оланы сав этмеге къыйын бола. Хирург операция этген сонг да, ташлар дагъы да болмагъа башлай. Неге тюгюл, адамны яшаву ташлар болагъан шартларда давам этиле.
Бизин вакътиде шолай ташланы тайдырагъан «эмчилер» кёп болуп бара. Ондан сонг авруйгъан адамны кисеси де хыйлы «енгил» бола. Кёбюсю гезиклер шондан сонг рентген этип къараса, шо ташлары еринде экенин гёрежек. Охувчулагъа буса шо ташлагъа къаршы къолланагъан кёп йыллардан берли сыналгъан эки къайданы таклиф этмекни арив гёребиз.
Оьтюндеги ташланы чыгъарагъан биринчи къайда: бир стакан къабугъундан тазаланмагъан арпаны аласыз. Ону жувгъан сонг, уьстюне бир литр къайнагъан сув тёгюле, ондан сонг шону печни уьстюне салып, аз отну уьстюнде бир сагьат къайната. Сюзюп онгаргъан сонг, ону сав гюнню узагъында ичип тура, шолай 40 гюн этмеге тарыкъ. Ташлар ирий ва авуртмайгъан кюйде чыгъа.
Бюйреклердеги ташланы чыгъарагъан къайда: 1 чайкъашыкъ толгъан гьюрбечни урлугъуна бир стакан сув да тёгюп, шону къайната. Къайнагъан сонг ону суву къалын болажакъ. Шо саялы огъар дагъы да сув къошмагъа ярай. 2–3 гюнню узагъында гьар 2 сагьатда ярты стакан этип ичмеге герек. Бир башлап оьзюгюзню докторугъуз булан гьакълашсагъыз яхшы.
Бувунланы аврувлары
Бувунланы аврувлары, къайдагъы артритлер ва артрозлар кёп яйылгъан. Медицина таклиф этеген ва багьа токътайгъан багъывгъа да къарамайлы, ону асуву аз. Бувунланы сав этивню халкъ арада къолланагъан асувлу къайдасын таклиф этме сюемен.
Хамхарти таблеткалардан гючлю
Хамхартини япыракъларын юлкъуп алып, жувуп, сувун акъма къойма герек. Увакъ этип туврама яда эт тюеген машинден чыгъарма, къоллар булан сыгъып, сувун тайдырма тарыкъ. Шо сувгъа теппе-тенг этип, тройной одеколон, гьаракъы яда спирт къошма тюше. Сонг бувунларыгъызгъа ишып сюртме зат гьазир бола. Шиша савутгъа тёгюп, уьйню иссилигиндеги шартларда сакълама тюше. Адатлы гьалда уьч литрлик балон булан гьазирлейсиз. Шо кёп замангъа бола.
Пайдаландыргъанча алдын шо дарман сувну (настойканы) аталай ва гече къолларына сюрте, исси кофта гие. Эки айдан бувунларыгъызны авуртагъаны тая. Шо настойканы сюртген сонг, авуртагъаны шоссагьат тая.
А. НЮРМАГЬАММАТОВ,
медицина илмуланы кандидаты.
Кабахурманы пайдасы
Мадинада оьсеген ва оьзюню пайдасы гьакъда Магьаммат пайхаммарны (а.с.) гьадислеринде эсгерилген кабахурма – «къайырчакълыкъланы кампетлери» Ajwa Madina деген кагъыз булан сатыла ва адамлар оланы кёп сююп ала. Магьаммат пайхаммарны (а.с.) таклифлериндеги гьадисде айтылагъан кюйде, Мадинаны кабахурмасы гёз тиегенликден ва халмачлардан сакълай, шолай да савлай къаркъараны беклигин болдура. Араплар огъар «савлукъну къуюсу» деп айта. Онда адамгъа пайдалы бары да витаминлер ва оьзге затлар бар.
Кабахурманы холестерини ёкъ, адамны семиртмей. Бир кило емишде 3 минг калорий тюгюл ёкъ. Шо гёзлени гёрегенлигин ва эшитегенликни къолайлашдыра. «Къайырчакъланы бийкеси» гёзлерин къайтмагъа къоймай ва сангыравлукъдан сакълай. Оларда кёп фтор бар, фтор буса тишлерин бузулма къоймай. Араплар: «Кабахурма ашагъыз, тишлени савлугъу болур», – деп негьакъ айтмай. Къуранда кабахурма 20 керен эсгериле.
