Халкъны савлугъун болдурмакъ учун этилеген къуллукъ адам арада нечик абурлу экени айтмаса да англашыла. Эгер де о къуллукъгъа берилген адамлар ишинде оьзлени жаваплыгъын толу кюйде англай буса чы, савлукъ сакълав тармакъ даим алгъа баражагъы мекенли. Докторлагъа адамны сав этмек учун гьалиги заманда бары да зат етише деп айтма ярай, етишмей буса, о – адамны хасиятында болагъан гьайсызлыкъ.
Шо гьайсызлыкъны, мекенли ёлбашчы болса, коллективни ичиндеги къайсы адамдан да тайдырма къыйын болмай. Ёлбашчыгъа буса не тарыкъ? Озокъда, бажарывлукъ. О да аслу гьалда сынав булан топлана.
Мен Бабаюрт район больницаны баш врачыны кабинетине гиргенде, онда олтургъан тезги танышым Шигьмагьаммат Дугужевни гёргенде, тамаша болуп: «Сен чи бираз алда Хасавюрт районну баш врачы эдинг, мунда нечик чыкъгъансан?» – дедим. Ол гьазирине, магъа гёре оьзю де масхарагъа салып: «Бажарывлу адамны пайдасы бир ерден эсе кёп ерге тийсе яхшы», – деп иржайды.
Бабаюртдагъы савлукъ сакълав идараны этилме герекли ишлери кёп, чечилмеген хыйлы масъалалар бар. Биринчиси, районну территориясында тав юртланы кёп къотанлары ерлешген. Олар, булай алгъанда, оьзлени тав юртларыны кёмегинден пайдаланма тарыкъ. Тек, Бабаюртгъа гелип, больницагъа гирип, кёмек къаравуллай буса, шо къуллукъну кютмесе бажарылмай. Оьрден берилеген харж буса, больницагъа къотанлардан савлугъун беклешдирме гелегенлер булан бирче гелмей чи. Шо масъаланы да тюзевлю чечме заман болгъан. Кёбюсю ерлерде фельдшер-акушер пунктлар, амбулаториялар да ёкъ. Шигьмагьаммат Дугужев англатагъан кюйде, ол 9 ФАП-ны ва 4 врач-амбулаторияны къурулуш ишлерин программагъа гийирген. Врач-амбулаториялар Ибрагьимотарда, Уцумиюртда, Герменчикде, Янгыюртда къурулажакъ.
Бирдагъы къыставуллу къуллукъ – баш врач англатгъан кюйде – лаборатория анализлени этмек учун больницада имканлыкълар ачылагъаны.
Бабаюртлулар учун больница бек онгайлы. Баш врач эсгерген кюйде, хас ясандырывлар, дарманлар, оьзге тюрлю медицина аппаратлар бар. Рентген аппарат алынгъан, 3 «скорый помощь» машин гелген, гёзге гёрюнеген оьзге тюрлю этилип турагъан ишлер де бар. Олани бириси – больницаны территориясында ишленип битип турагъан бек арив къайдада къурулгъан намаз этеген уьй. О да тарыкълы. Аврувланы гёрме гелеген, гетеген бола.
Больницада терапия, хирургия, гинекология, инфекция, реанимация бёлюклер ва яшланы бёлюгю бар. Тийишли нормалагъа гёре дарманлар, ашамлыкъ продукция, оьзге тюрлю тарыкълы маллар да етише.
