Алкълыч Алкълычев,
экономика илмуланы доктору:
– Мен бизин республиканы янгы башчысындан къаравуллайгъанымны айтсам, шулай деп эсгерме тюшежек. Къайсы ишге алына буса да, адамны яхшы янларына тергев берме тийишли бола.
Экономика оьсювню болдурмакъ учун, башлап производство ишлени аякъгъа тургъузмаса бажарылмай. Экономиканы пайда гелтиреген кюйде къурма тарыкъ. Далапчылагъа кёмек этмесе де болмай.
Бизин республикада гёчювюл отлавлукълар деп айтылагъан топуракълар Дагъыстан Республиканы Гьукуматыны еслигине гире. 131-нчи законгъа гёре шо топуракълар, къайсы юртну къырыйында ерлешген буса, олагъа берилме тарыкъ.
Шагьарлар юртланы ерлерин алма сюе. Экология жинаятчылыкъ бар. Тийишсиз ишлейген карьерлер де бар. Агъачлыкъларда тереклер артыкъ кёп гесиле.
Гьакимлик ишге алагъанда кёбюсю гьалда алда да шо къуллукъларда ишлегени яны тутула. Янгы адамлар тарыкъ. Сынаву ёкъ буса да, олар ишни къурма бажаражакъ.
Федерал законланы да, регион законланы да бир-бирине ёл берме сюймей юрюйген кюйлери де бола. Регион законланы федерал законлагъа къаршы чыгъарып, оьзлеге, тухумларына пайда гелтирме сююп ишлейгенлер де бар. Бир-бир законлар гючден къабул этилегени де эс этиле.
