Январ айны 13-нде Россияны маълумат къуралларыны, Печатыны, журналистлени гюню белгилене. Шо тарихи тархгъа байлавлу 1703-нчю йыл 13-нчю январда I Пётр пачаны Указы булан орус тилде биринчилей «Ведомости» деген газет чыкъма башлагъан. Шо газет Москвада ва Санкт-Петербургда чыгъып тургъан.
1870-нчи йыл январ айны биринден башлап, орусча ва тыш пачалыкъларда чыгъагъан газетлеге почтадан таба язылыв башлангъан. 1914-нчю йылда буса гьар тюрлю атлары булан Россияда 3 мингден де артыкъ газетлер чыгъарылгъан.
1917-нчи йылдан башлап, Россияны печатыны гюню 5-нчи майгъа салына. Шо гюн янгы советлени «Правда» газетини биринчи номери чыкъгъан болгъан.
1991-нчи йыл РСФСР-ни Оьр Советини Президиумуну Указы булан Россияны печатыны гюню 13-нчю январгъа салына.
Касбучуланы гьисап этивюне гёре 2009-нчу йылда Россияда гьар тюрлю атлар булан 33 минг печат къураллар чыгъарылгъан. 2000-нчи йылдан эсе – эки керенге артыкъ. Печат къураллагъа язылагъанланы санаву буса 20 миллиондан да артыкъ болуп токътагъан.
«Роскомнадзорну» гьасиллерине гёре, 2022-нчи йылны январ айына Россияда 150 мингден де артыкъ печат къураллар чыгъарылагъаны гьисапгъа алынгъан. 2018-нчи йыл РФ-ни Президентини Указы булан «Россия Федерацияны ат къазангъан журналисти» деген ат печат къуралларда ишлейгенлеге берилме башлагъан. 1997-нчи йылдан башлап буса печат къуралларда ишлейген журналистлеге печатны гюнюнде РФ-ни Президентини савгъаты да тапшурула.
Дагъыстандагъы печат къуралланы гьакъында айтсакъ, шоланы санаву 354-ден де артыкъ. Темиркъазыкъ-Кавказ федерал округгъа гиреген республикаланы арасында биринчи ерде. Эсгерилген санавдан 278-и печат къураллар – газетлер ва журналлар болуп чыгъарыла. Къалгъан 76- сы – сетевой изданиелер.
