Къарабудагъгент районну жамият советини генгешинден

Бизин республиканы топуракъларында асрулар боюнда кёп миллетлени вакиллери дослукъда ва татывлукъда яшап геле. Буса да миллетлени арасында бир тюрлю масъалалагъа байлавлу разисизликлер болмай десек де дурус болуп битмес. Шолар болгъан ва гележекде болмагъа да имканлы. Неге тюгюл, рази тюгюллер гьар заманда да болгъан ва болажакъ.

Янгыз оьз башыны пайдасыны гьайын этип айланагъан бир тайпалар не этип де татывсузлукъну тувдурмагъа бола. Амма халкъ, насипге, шолай питне салагъанланы артына тюшмей. Ерлерде гьакимлик къурумларыны вакиллери де, жамият къурумлагъа къуршалгъанлар да гьар гюнлюк ишинде шо айрыча маънасы булангъы масъалагъа тергевюн бакъдыра.

Артдагъы гюнлерде Къарабудагъгент районну жамият советини гезикли генгеши миллетлени аралыкъларын беклешдиривге багъыш­ланып оьтгерилгени де шогъар шагьатлыкъ эте. Ачыкълашдырып айтгъанда, «Свободная республика» газетни бетлеринде чыгъарылгъан журналист Магьамматтагьир Муртазалиевни «Никогда не разговаривайте с незнакомцами» деген макъаласы шо генгешни оьтгеривге аслу себеп болуп токътады. Генгешни ортакъчылары инг алда, макъалада айтылынагъан кюйде, къарабудагъгентлилени де, къурбукилилени де арасында эки юз йылланы боюнда эришивлюклер къайтып-къайтып оьрчюп тура дейген пикругъа разисизлигин билдирди. Оьрде эсгерилген районну жамият советине къуршалгъанлардан къайры да, ерли депутатлар, олай да халкъ арада, эл арада герти абургъа ла­йыкълы болгъан оьзге адамлар респуб­ликаны оьлчевюнде чы­гъарылагъан маълумат къураллары миллетлени арасында питнечиликни тувдурувгъа ёл бермеге тюшмейгенин ташдырды.

Къарабудагъгент районну жамият советини ёлбашчысы Магьамматсайит Гьабитов гюнлюк низамда белгиленген масъаланы малим этип сёйледи.

– Къарабудагъгент районну халкъы дослукъда ва татывлукъда яшап геле. Амма шо татывлукъну бузмагъа сюегенлер де къаршы болмай тюгюл. Не этмеге герек, бир тайпалар питнечиликни бойнуна алып айлана. Бир-бир маълумат къуралланы къуллукъчулары бизин райондагъы гьалланы да къопдуруп гёрсетмеге къарай. Оьзю­ню макъаласы бизин сесленмеге борчлу этген Магьамматтагьир Муртазалиев де шолай къасткъылагъанланы бириси гьисаплана. Макъалада эсгерилегени йимик, бизин районда миллетчилик къулач яя. Тек ону гьасиллери булан бирдокъда рази болуп къалмагъа бажарылмай. Неге тюгюл де, ол гьакъы­къатгъа къыйышмай­гъан далиллеге асасланып, охувчуланы пикрусунда терс ойланы яратмакъ муратда гьар заманда ялаябыв макъалаланы арагъа чыгъара.

Шондан сонг оьзюне сёз берилген «Толеранс» деген бирлешивню ёлбашчысы, Къарабудагъгент район жыйыныны депутаты, ДР-ни милли политикагъа къарагъан министерлигини жамият советини члени Абсалютдин Мурзаев ону пикрусун узатды. Къурбуки юртда ишленген больницаны пайдаландырывгъа беривню айланасында тувулунгъан гьалны гьакъында маълумат берди.

– Бизин къазапланмагъа борчлу этип турагъан макъалагъа байлавлу Къарабудагъгент район жыйыныны сессиясында депутатлар чакъырыв къабул этди. Чинкдеси, Къарабудагъгент районну администрациясыны ва депутатланы атындан шо макъала миллетчиликни отун якъмагъа бакъдырылгъаны гьакъындагъы арза прокуратурагъа тапшурулгъан. Бизде яшайгъан миллетлени яшавну денгизинде юзюп турагъан бир гемеге ошатып сёйлесек, арагъа салынып ойлашылагъан макъала шо гемени тик толкъунланы уьстюнде чайкъата­гъанлыкъ бола. Мисал учун айтгъанда, билим берив ожакъланы ёлбашчыларын ерли гьакимлик къурумлары белгилей. Савлукъ сакълав идараларыны ёлбашчыларын белгилев буса шо тармакъгъа къарайгъан министерликни ихтиярында деп айтып, ерли гьакимлик къурумлары ва депутатлар немкъорай янашмагъан болгъан буса, Къурбукиде къурулгъан больницаны айланасында, балики, шулай къувунлу гьал тувулунмажакъ эди.

А. Мурзаевни сёйлевюнден белгили болгъаны йимик, участка больницада бир вакътини ичинде 75 адам ятып савлугъун беклешдирмеге, олай да поликлиникасында гюнню уза­гъында 100-ге ювукъ аврувну бакъмагъа бажарыла. Шону къурулушу Россияны Президенти Владимир Владимирович Путин берген тапшурувгъа асасланып юрюлген. Шону къурулушу да Къарабудагъгент районгъа гиреген Къурбуки, Губден, Сираги, Манас, Жанга юртларында яшайгъанлар экстремизмге ва террорчулукъгъа къаршы турувда жагьлыкъ гёрсетгени гьисапгъа алынып башлангъан. Шо больницаны къурулушуна бюджетден гёрсетилген аслам акъча маялар да харжлангъан.

Гьалиги заманны талапларына жавап береген кюйде ясандырылгъан ва районда инг уллу савлукъ сакълав идараларыны бириси гьисапланагъан шо больницаны къурулушу уьстюнлю кюйде тамамлангъан. ДР-ни мал-матагьгъа ва топуракъ масъалалагъа къарайгъан министерини къарары булан бу йылны башлапгъы гюнлеринде Къарабудагъгент район больницаны табилигине берилген. Больницаны бинасыны къурулушун башлайгъанда район центрдан йыракъда ерлешген юртланы халкъын сан янлы кюйде савлугъун беклешдиривге байлавлу талаплары гьисапгъа алынгъан. Россияны Президенти В. В. Путинни Чакъырыв кагъызында 2020-нчы йылгъа белгиленген ерли савлукъ сакълавгъа байлавлу гесимлер яшавгъа чыгъарылгъан. «Свободная респуб­лика» деген газетдеги макъа­ласында М. Муртазалиев гьакъы­къатгъа къы­йышмайгъан далиллени гелтирегенден къайры, къалп, ялгъан маълуматланы да яя.

Губденлилер ва къурбукилилер яшав юрютюв шартларында, опуракъ гийиминде милли оьзтёречелигин сакълагъаны гьакъда айта туруп, макъаланы автору къарабудагъгентлилеге яла ябагъанын эсгерди.

Макъаланы автору эсгереген кюйде, янгы больницаны бинасы къурулагъаны саялы къурбукилилеге, сайки, гьар гезик де сайлавларда Путинге тавуш бермеге тюшген. «Бизин топуракъда Къарабудагъгентден таба ёлбашчылыкъ этеген больница иш гёрмежек», – деген, сайки, къурбукилилени атындан айтылагъан калималар да ялгъан.

Генгешни барышында Къарабудагъгент районну жамият советине гиреген М. Канзитдинов, М. Гьасанханов, И. Гьакимова, Ж. Мирзаев, А. Асапов, И. Ибадуллаев де арагъа салынып ойлашылагъан масъаланы айланасында оьзлени пикруларын айтды. Районда яшайгъан къумукъланы санаву кёп болса да, тувулунгъан масъалаланы чечивде, айрыча жаваплы къуллукълагъа касбучуланы белгилевде даргилилер де унутулуп къалмайгъанын эсгерди. Къарабудагъгентлилер оьзлеге абур-сый этип гелген район больницаны терапия бёлюгюне ёлбашчылыкъ этип тургъан Насап Жангишиевни, чалтлыкъда медицина кёмек болдурув къуллу­гъуну врачы Абдулбасир Шигьакаевни атларын уллу гьюрмет булан айтды. Кёп йылланы узагъында район больницаны яш табагъан бёлюгюню ёлбашчысы гьисапда чалышагъан Балкъият Гьашимова бажарывлу касбучу гьисапда танылгъанын гертиледи. Олар губденлилер болса да, къарабудагъгентлилер оьзлени ят гёрмей, юртлуларына йимик янашгъанын ташдырды. Гьар къайсы макъаланы уьстюнде ишлейгенде де журналистге халкъ арада, эл арада айтылагъан пикруланы, ойланы ахтигин ахтарып, охувчуланы арасында дурус пикруну яратмагъа борчлу экенин билдирди.

Айтылгъан сёз – атылгъан окъ экенин яхшы англайгъан журналист Магьамматтагьир Муртазалиевни законну ёлунда жавапгъа тартмагъа таклифлер этилди. Шону булан бирге, миллетлени арасында питне салывну, татывсузлукъну тувдурувну ёлунда оьзлеге пайда болар йимик иш гёрегенлени гьаракатына къазапланывун билдирди. Къарабудагъгент район жыйынны депутатлары оьрде эсгерилген макъалагъа байлавлу чакъырывун, олай да прокуратурагъа тапшурулгъан арзаны бир гёнгюлден якълады ва шо гьакъда къарар къабул этди.