Бир-бир яшланы сабий вакътисинден тутуп, не буса бир касбугъа амракъ болуп, юрегинде умут булан шо касбугъа ес болмагъа бажара. Озокъда, гьар яшгъа ата-анасы яда уллатасы-улланасы таъсир эте. Къазанышлы яш врач Азамат Гьашимов да оьзюню касбусун гиччиден тутуп уллатасы Камил Гьашимовдан уьлгю алып, юрегинде уллу болгъанда мен де уллатам йимик доктор болажакъман деген мурат булан оьсюп уллу бола.
Шолайлыкъда, Азамат школаны охуп битген сонг, Дагъыстан пачалыкъ медицина академияны тамамлап, юрегиндеги асил муратгъа етише. Бугюнлерде ол Дагъыстан Республикада белгили «Здоровье» деген медицина центрда чалыша. Азамат янгы иш башлагъан яш врач буса да, адамланы арасында оьзюню касбусуну сырларын яхшы билеген врач гьисапда танывлу. Ол гьар гюн дегенлей адамлагъа тыныш алмагъа пуршав этеген аврувну сав этмекни гьайында операциялар эте.
Жагьил адам янгы ишлеме башлагъан, тек бажарывлу кюйде чалышагъан касбучу Азамат Гьашимов булан бизин мухбирибиз редакцияда ёлугъуп баянлыкъ алгъан. Шону охувчуланы тергевюне беребиз.
– Азамат, оьзюнгню касбунгну нечик сайладынг? Сени касбу сайлавунга янгыз сени уллатанг таъсир этдими?
– Мен яшдан берли уллатамны яда улланамны янына бара туруп (олар атамны атасы рентгенолог болуп, атамны анасы да, анам да медсестра болуп ишлей эди), медицина касбугъа шолай амракъ болдум. Гиччиден берли доктор боларман, адамланы сав этежекмен деген ойлар булан оьсдюм. Тек уллу бола туруп, башгъа касбулагъа да тергев береген болдум, 11-нчи класгъа чыкъгъанда не буса да бир касбугъа токъташмагъа герек эдим. Атам-анам да мен доктор болгъанны сюйдю. Гиччиден берли шо касбугъа гьаваслыгъым барны да гёз алгъа тутуп, медицина оьр охув ожакъны сайладым. ЕГЭ-ни натижаларына гёре охумагъа тюшегеним саялы, янгыз Дагъыстан медицина академиягъа тюгюл, дагъы да эки оьр охув ожакъгъа документлеримни бердим. Бириси оьр охув ожакъларда да оьтген эдим, мени насибиме, Дагъыстан медицина академиягъа къабул этилгенимни билип сююндюм.
– Сени чагъынг яш буса да операциялар этесен, доктор болуп ишлеме къачан башладынг?
– 2017-нчи йылда ординатураны тамамлагъан сонг ишимни «Здоровье» деген медицина центрда башладым. Инг башлап ординатурада охуйгъан вакътиден берли, шонда касбу сынав топламагъа да юрюй эдим. Олар мен оьзлерде ишлемеге къалгъанны сюегенни билдирди. Мен де рази болдум.
– Сени касбунгну аты – отолоринголог. Бу касбуну нечик сайладынг?
– Охуйгъан вакътисинде студентлер медицинада бир касбуну сайлама герек. Мен шо ЛОР бёлюкню оьзюме ювукъ гёрдюм, адамланы арасында тыныш алагъан санларыны аврувларын бакъмагъа, сав этмеге иштагьлы болдум. Ахырда ЛОР докторну сайладым.
– Аз ишлесенг де, яхшы сынавунг баргъа ошай. Азамат, гележекде не йимик муратларынг бар?
– Къайсы касбучу да билимин, касбу даражасын артдырмагъа герек. Докторлар буса айрокъда шо ягъына айры тергев бермеге герек. Бизин сынав топлама да, илму ёлда чалышма да имканлыкъларыбыз бар. Шолай хыялларым мени де бар. Гележекде оьзюмню муратларыма етмеге умут этемен. Къумукъларда да айтагъанлай, гьаракатгъа – берекет!
– Демек, бугюнлерде илму ишлеге тергев этмеге башлагъанмысан?
– Ёкъ, башламагъанман. Илму ёлбашчым да ёкъ гьалиге. Илмугъа урунгъанча, инг башлап касбумда сынав алмагъа, бажарывлугъумну теренлешдирмеге къастым бар.
– Азамат, ишлей туруп, нече тюрлю гьаллар булан рас бола адам? Бугюн сени ишинг рази къалдырамы?
– Озокъда къалдыра!
– Сен ишингни Интернетден таба гёрсетип, айрокъда инстаграммда гьаракат этегенингни эследим. Шо ишингни алгъа барывуна кёмек этеми?
– Гертиси, Интернетге тындырыкълы кюйде тергев этмеймен. Инстаграммны да толу кюйде къолламайман. Нечик де, бош къалмасын деп, аз буса да ишимни гёрсетме къарайман. Эгер де толу кюйде юрюте болгъан бусам, дагъы да кёп кёмеги тиежек эди. Гьали буссагьат юрютеген кюйде де, аз болса да, кёмеги тие. Ишимни гёрюп, адамлар да оьзлени ЛОР аврувлары булан геле. Арт вакътиде магъа язылгъанланы санаву да артып тура. Мени сагьифамны 10 мингден артыкъ адам гёре.
– Азамат, операция этмеге къыйынмы? Яда этген операцияланы арасында айрыча четимлери боламы?
– Гьар операция бири-бирине ошамай. Мисал учун, гьар адамны да санларында оьзтёрече башгъалыкълары бола. Къыйын болса да, тюз кюйде этмеге бажармагъа, ёл табып билмеге герекмен. Шо саялы шу къыйын эди, бу адамгъа тынч эди деп айтмагъа болмайман. Къайсы операция да сонгунда оьрчюкмей сав болгъаны герек. Гьалиге шолай гезиклер болмагъан, гележекде де болмас бугъай.
– Сени алдынга операциягъа кимлер геле? Уллу чагъына етишген адамлармы? Яда яшлар да гелеми?
– Кёбюсю гьалда яхшы тыныш алып болмайгъан адамлар геле. Умуми алгъанда, бурнуна кёмек тарыкълар геле. Тамакъ аврувлагъа операциялар этмеге гьали де урунмагъанман. Бурну булан тыныш алыв аврувланы етдирикли кюйде яхшы билмеге герекмен. Бир агъымны сырларын теренден уьйренмеге герекмен деп ойлашаман. Бары да ишни бирче яхшы билмеге тынч тюгюл. Мени алдыма яшлардан башлап, уллу чагъына етген адамлар да геле. Яш заманында аврувгъа тергев бермей, уллу болгъанда дагъы да бек оьрчюкгенде гелеген гезиклер де бола. Геч болгъанда, озокъда, барына да бир йимик кёмек этмеге де бажарылмай.
– Мисал учун, яшны оьрюм вакътисинде бурнунда оьсеген этлер бола. Шолар яшланы бурну булан тыныш алмагъа къоймай, кёбюсю гьалда авзу булан тыныш ала, авзун ачгъан кюйде юхлай, тамакъ аврув да билинме бола. Шолай яшланы нечик сав этмеге герек? Бир-бир ата-аналар 14 йыл болгъанча къоймагъа герек деп, операция этмеге рази болмай. Сен шо бёлюкде ишлейген доктор гьисапда не насигьатлар берер эдинг?
– Бу соравгъа жавап бермеге тынч тюгюл. Шолай аврувну 14 йыл болгъанча тиймей къойма ярайгъан яда тезликде операция этмеге герек гезиклер де бола. Инг башлап яшны аврувун тындырыкълы кюйде ахтармагъа герек. Доктор салгъан диагнозгъа гёре чаралар гёрмеге тийишли. Шо саялы тергевсюз къоймагъа ярамай. Яш заманында яшланы аврувуну гьайын этмесе, уллу болгъанда сав этмеге къыйын бола. Айрокъда онда эшитип, мунда гёрюп, оьзюгюз оьзюгюзню сав этебиз деп къаст этмегиз деп айтмагъа сюемен. Шолай этмеклик заманын, харжын, аслусу, савлугъун тас этгенден къайры, дагъы яхшылыкъ гелтирмей.
– Кёп савбол. Ишингде уьстюнлюклер ёрайман!
– Сиз де савболугъуз!
Бизин маълумат:
Азамат Гьашимов 1992-нчи йылда Тёбен Къазанышда Аминат ва Дагьир Гьашимовланы агьлюсюнде тувгъан. Тёбен Къазанышдагъы 2 номерли орта школаны битдирген сонг, Дагъыстан медицина академиягъа 2009-нчу йылда охумагъа тюшген. 2015-нчи йылда оьр охув ожакъны тамамлагъан сонг, оьзю практикагъа юрюген «Здоровье» деген медицина центрны чакъырывуна гёре онда ишге алынгъан. Бугюнлерде де лор-хирург гьисапда Азамат шо центрда ишин узата. Уьйленген, 1 яшы бар.
