Республика парламентни спикери Завур Аскендеров Дагъыстанны Конституциясына, республиканы дазу аманлыгъыны гьакъында айтылагъан ерине, не учун алышынывлар этилегенине толу кюйде тюшюнмей сёйлейгенлеге англатыв этген.
«Артдагъы вакътиде Конституциягъа этилеген алышынывлагъа адамланы тергевю артагъаны гёрюне. О ери англашыла, Конституция – бизин Аслу Законубуз. Республика да огъар гёре яшай. Алышынывланы маънасын англамай туруп биревлер дагъыстан топуракъланы дазулары оьзлени ерлеринден тайышма бола деп эсине геле.
Англатып айтма сюемен, бизин уьлкени ва ону ичине гиреген субъектлени де территория аманлыгъын сакълав къуллукъ Россия Федерациясыны пачалыкъ борчларына гире. О саялы да федерал законуну талапларына гёре Дагъыстанны Конституциясына алышынывлар этилме тарыкъ.
Пачалыкъланы территория аманлыгъы бютюн дюньяда да халкъара ихтиярлыгъы булан белгиленген. Шо да тыш пачалыкъланы заралындан сакъланмакъ учун этиле. Алышынывлар не Россияны, не Дагъыстанны ва ону оьзге регионларыны дазуларына кар этмей. Республиканы дазуларын алышдырмакъ учун ону ватандашлары булан референдум оьтгерме герекли бола. Шосуз бир дазуну да бирев де алышдырып болмай.
Дагъыстанны Конституциясына этилеген къошум алышынывлар бир янындан да республиканы дазу аманлыгъына яманлыкъ гелтирмежек. Шону учун да сизден тилеймен, гьар тюрлю «питнечилеге» инанмагъыз. Бизин территория дазулар, яшайгъан халкъны разилиги болмаса, бир заманда да башгъача къурулмажакъ», – деп билдире Дагъыстан Республиканы Халкъ Жыйыныны Председатели Завур Аскендеров.
