Яшланы асгерге чакъырыв давам этиле. Оланы ерлерде бёлюклер этип, уьйретив ерлеге йибере. Оьтген жумада Дагъыстанны Халкъ Жыйыныны председатели Завур Аскендеров дагъыстанлылар дав этивню сырларын уьйренеген Мычыгъыш Республиканы Калиновская деген юртунда болду. Ону булан бирге халкъ депутатлар Магьаммат Патхуллаев, Магьаммат Магьамматов, Алиасгьап Шабанов, Самир Абдулхаликъов и Дайитбек Сайипов бардылар. Завур Аскендеров асгерчилер турагъан гьалланы тергеди ва казармасына, сонг ашханасына барды. Чакъырылгъанланы къарав якъдан бир де арзы ёкъ, яйлыкъ ва къышлыкъ гийим берилген, уьйретив дарслар юрюле, ашамлыкъ булан таъмин этив яхшы. Яшавлукъ сетлерде яйылагъан савут-гийим ёкъ деген хабарлар ерсиз экенни айтдылар. Яшланы ашатагъан кююне Завур оьзю де бек рази болду, олар булан тюшашны да ашады.
Чакъырылгъан яшлар оьзлени агьлюлерине къарав болдургъанны гьакъында айтды, бириси чи атасын сабур этмекни тиледи. Уллу чагъына да къарамай, ол да дав этеген ерге талпына. Яшланы тилевлери тергевсюз къалмады.
Завур Аскендеров олагъа айтгъан кюйде, гьар районда ва шагьарда Дагъыстанны Халкъ Жыйыныны сиптечилиги булан мобилизация этилингенлени агьлюлерине кёмеклешив центрлар ачылгъан ва шонда депутатлар гелген арзалагъа къарай. Ону тапшурувуна гёре гьар районну башчысы оьзлени боюндан чакъырылгъанлар булан ёлугъувлар оьтгережек ва агьлюлерини талапларын кютюп туражакъ. Халкъ Жыйында, не заманда сёйлесе де, жавап бережек телефонлар да ишлейгени де яшланы кепине гелди.
– Агъаларым-инилерим, мен сизин булан лакъыр этдим, яшав гьалыгъыз булан таныш болдум, гёремен, сизин Ватаныгъызны якъламагъа ругьугъуз бар, – деди ёлугъувдан сонг Дагъыстанны Халкъ Жыйыныны председатели Завур Аскендеров. – Шо бек яхшы. Сиз оьзюгюзге салынгъан борчланы намуслу кюйде чечигиз, биз буса сизин агьлюлеригизни къаравсуз къоймажакъбыз. Сав-саламат болуп, уьстюнлюк булан къайтыгъыз, биз сизин гёзлеп туражакъбыз!
