Язбашны биринчи гюнюнде «Ёлдаш» газетни редакциясына къонакълай йырыкъ Якъутиядан якъут тилде чыгъагъан «Кыым» («Учгъун») деген газетни баш редактору Дмитрий Иванов гелди. Шондан алда ол Терекли-Мектеб юртда ногъай тилде чыгъагъан «Чёлну тавушу» деген газетни коллективинде де къонакълыкъда болма чола тапгъан.
Арада юрюлген лакъырда якъут къонакъ оьзлени газетини гьакъында хабарлады. Ери гелгенде эсгермеге ярай, «Кыым» — якъутланы арасында белгили газет. Оьзгесин айтмагъанда, 48 бет булан чыгъагъан газетни тиражы 20 мингден де оьте.
Дмитрий Иванов «Ёлдаш» газетни редактору Рустам Жалакъов булан милли маълумат къуралланы оьсювюню масъалалары, тарихи илмуланы кандидаты Юсуп Идрисов булан бизин миллетни бырынгы мюгьлетлерини гьакъында, «Ёлдашны» адабият бёлюгюню редактору Яраш Биймурзаев булан буса – къумукъланы адабият мердешлерини гьакъында пикирлешди. Ёлугъув исси оьтдю.
Редакцияда болгъан ёлугъувдан сонг, Дмитрий Иванов «Ёлдашны» къуллукъчулары булан бирге Къумукъ театргъа да бардылар. Театрны директоруну орунбасары Юсуп Гьюсейнов сагьнагъа салынагъан пьесаланы, къаравчуланы санаву, оланы бир-бир бёлюгюне оьз фондларындан таба акъча чыгъарылагъанны гьакъында хабарлады. Шо якъдан алгъанда, бизин театр Россияны лап да уллу милли республикасыны милли театрындан артда чы нечик де къалмайгъаны, гьатта бир-бир гезиклерде гьал яхшы экени ачыкъ болду. Театрны суратчысы Магьаммат Моллакъаев къумукъланы сурат этивчюлюк саниятыны оьсювю, Айгъазини йырыны мисалында къумукъларда милли намусну сакъланывуну къайдаларыны ва оьзюн тутма герек кюйню гьакъында айтды.
Къонакъ билдирген кюйде, ол къумукъланы ва савлай Дагъыстанны гьакъында кёп затны билме болду. Мисал учун айтгъанда, ол милли макъамланы ушатагъан якъутланы кёп сюеген йыраву Альбина Къазакъмурзаева къумукъ экенине тамаша болду. Ону Капий денгизни аривлюгю, Дагъыстанны гёрюнюшлери ва мундагъы къонакълыкъ адатлар гьайранлыкъгъа къалдырды.
«Мен ерли халкъыма Туркиягъа, Египетге яда Тайландгъа тюгюл, Дагъыстангъа барыгъыз деп айтажакъман, насипге, аз алда Якъутск-Магьачкъала авиарейслер де ачылды», — деп сёз берди Дмитрий Иванов уьюне элтеген йыракъ ёлгъа чыгъа туруп.
