Бабаюрт район оьзюню юрт хозяйство тармагъыны асувлугъу булан таныла гелген. Озокъда, гетген асруну 90-нчы йылларында савлай уьлкеде тувулунгъан кемчиликлени натижасында хыйлы низамсызлыкълагъа тарыгъанны да яшырмагъа тюшмей. Амма артдагъы йылланы ичинде шо тармакъ янгы гюч булан оьзюню оьсювюн башлагъанына сююнмей болмайсан. Бу йыл районну юзюмчюлери етишген уьстюнлюклер де шогъар шагьат.
Яшырмагъа негер тарыкъ, районну юзюмчюлерини загьматыны гьасиллери, оьзге йыллар булан тенглешдиргенде, лап яхшы деп айтма ярай. Мен алда да эсгерген йимик, юрт хозяйство тармакъны лап да гелимли тармагъына гьисап этилеген юзюмчюлюк Бабаюрт районну Хамаматюртунда оьсе бара. Бу йыл онда 157 гектардагъы юзюм бавлар тюшюм берди.
Бабаюрт район администрацияны юрт хозяйство управлениесинде билдиреген кюйде, Хамаматюртдагъы «Хазар» деген сабанчы-фермер хозяйствосунда 66 гектардагъы бавлардан 526 тонгъа ювукъ юзюм салкъынлар алмагъа болгъан. «Юзюмчю» деген сабанчы-фермер хозяйствосу буса 14 гектарда 80 тонгъа ювукъ татли емиш оьсдюрген. Айрокъда бу йыл «Алимханова» деген сабанчы-фермер хозяйствосу мол тюшюм къайтармагъа болгъан.
Айтагъаным, эсгерилген хозяйствода 21 гектардагъы юзюмлюклеринден 452 тон тюшюм алып, Къызлардагъы коньяк заводгъа тапшургъанлар.
Амма гьасиллер гёрсетеген кюйде, районну юзюмчюлери гёрсетген гьаракат яман чы нечик де тюгюл, шо тармакъны дагъы да генглешдирмеге герекни масъаласы да гётериле. Мисал учун айтгъанда, «Хазар» деген сабанчы-фермер хозяйство − 79,6, «Эсенболат» − 84,3, «Юзюмчю» − 57,1, «Алимханова» деген хозяйство буса оьзюню юзюм борлаларындан 215,2 центнерге ювукъ тюшюмлер жыймагъа болгъан.
Сонг да, юзюмлюклер хамаматюртлулар учун айрокъда агьамиятлы иш ерлени масъаласын да чечегенни айтмагъа сюемен. Шо ишлер, заманлыкъ буса да, савлай айны боюнда юзюмлюклерде 40-50-ге ювукъ адам иш ерлер булан таъмин этилди. Чинкдеси, олар алагъан алапаны оьлчевю де айны ичинде 20-30 минг манатгъа етишди. Артыкъ иш ерлерин айтып макътанып болмайгъан юртлар учун шо да уллу кёмек деп эсиме геле.
Озокъда, районну юзюмчюлюк тармагъында алгъа бармагъа дагъы да хыйлы имканлыкълар бар. Амма шогъар аслу гьалда районда алынгъан емишлени сакъламакъ учун хас имаратлар ёкълугъу, шо себепден ашлыкъ болдурувчулар оьзлер болдургъан ашлыкъланы оьзлеге пайдагъа тюгюлю, базар багьаларда сатмагъа борчлу экенлик пуршавлукъ эте. Шо масъаланы сабанчылар Бабаюрт районгъа Дагъыстанны Гьукуматыны башчысы гелгенде де гётердилер ва А.Абдулмуслимов масъаланы чечмек учун тийишли къурумлагъа тапшурув да берди. Берилген сёзлер яшавгъа чыгъар деп сабанчылар да умут этелер ва тангалагъа инамлы къарайлар.
