Юзюм бавларда ишлер сав йылны узагъында токътавсуз юрюле. Борла бутав шо ишлени арасында аслу ерни тута. Ону заманында ва бажарывлу оьтгерив гележек тюшюмге аслу кюрчю болуп токътай.
Шону гьисапгъа алып ва исси гюнлерден пайдаланып, Къаягент районну агрокомплексинде уллу предприятиелерден саналагъан «Къаягент» деген пачалыкъ унитар предприятиени юзюмчюлери де бугюнлерде борла бутав булан машгъул. Хозяйствону юзюм бавлары 500 гектардан къолай. Шоланы 477 гектары – тюшюм береген бавлар. Юзюмлюклердеги ишлени бугюн 3 юзюмчюлюк бригаданы ишчилери кюте. Хозяйствода 46 юзюмчю ишлей. Къыставуллу буса олагъа кёмекге къырдан адамлар чакъырыла.
Артдагъы гюнлерде хозяйствону юзюм бавларында болдукъ. Бу йылда да мол тюшюмлер алмакъ муратда бавларда кёп ишлер этилген: юзюм сыдраланы аралары сюрюлген, сугъарыв башлангъан, борла бутав юрюле, ремонт ишлер де башлангъан ва сан яны булан оьтгериле.
Авлакъ ишлени оьтгеривде Пирдавус Табтухова башчылыкъ этеген 1 номерли бригаданы коллективи алда. Бригадирни айтывуна гёре, гьар ишчи тапшурувларына жаваплы янаша, йылны тюшюмю оьзлени къолунда экенин бир де унутмай. Бригадагъа 132 гектардагъы юзюмлюклер бегетилген. Оланы къуллукъларын 30-дан да артыкъ юзюмчюлер кюте.
– Юзюмчюлюк тармакъда ишлейгеним 20 йыллар бола, – дей бизин булангъы лакъырлашывда 1 номерли юзюмчюлюк бригаданы алдынлы ишчиси сувчу Къурбан Сайитов. – Бу йылда да, алдагъы йылларда йимик, юзюмлюклерибиздеги ишлер гьава шартлагъа да къарамай, къурумлу юрюле. Артдагъы йыллар юртлу яшёрюмлер юзюмчюлюк тармакъгъа къайта башлагъан. Бугюнлерде бригадабызда оланы санаву арта.
– 2 номерли юзюмчюлюк бригадагъа бегетилген «Денгиз бой» деген участкадагъы юзюм бавларда да ишлер актив кюйде юрюле. Ишлени графикге гёре оьтгермеге гьаракат этебиз, – дей бригадир М. Шихалиев. – Тек ишчилер етишмейгени саялы, бир-бир ишлени оьтгерив артгъа салына.
Шихбаммат Жалилов башчылыкъ этеген 3 номерли бригада бу йыл къурулгъан. Бригадагъа Къаягент УОС-ну сувлар жыйылагъан кёлюню тюбюндеги янгы юзюм бавлар берилген. Ишчилер етишмейгенге гёре, бригада юзюм бавлардагъы ишлени оьтгеривге къырдан ишчилени де къуршай.
«Къаягент» деген ГУП-ну юзюмчюлерини хыяллары уллу. Оланы бугюнгю къайратлы загьматы 2023-нчю йылда яхшы натижалагъа гелтирежегине шекленмейбиз.
