Юзюм жыйыв давам этиле

Йылдан-йылгъа Дагъыстанда «татли емиш» деп гьисапланагъан юзюмню жыйыву арта ва авлакълары генглеше. Шо юрт хозяйство оьсюмлюкню болдурув бизин бойда адатлангъан, гьава шартлары да оьсдюрме имканлыкъ бере.

2020-нчы йылда республикада 205 минг тон юзюм жыйылгъан ва уьлкеде биринчи ерге чыкъгъан. Артындагъы йылларда да шондан кем тюшюм алынмагъан.

Озокъда, совет девюрню йылланы даражасына чыкъмагъа гьали де къыйын, неге тюгюл гьали юзюмлюклени майданы 30 минг гектаргъа да толмай. Совет девюрде буса 71,2 минг гектар ерде ерлешген болгъан. Республикада артдагъы йылларда 200 минг тондан артыкъ юзюм жыйыла, алда буса эки керенге артыкъ болгъан. Гьали Гьукуматны янындан этилеген кёмеклени къоллап, гьар йыл шоланы майданларын артдырма имканлыкъ бола.

Юзюмню болдурагъаны – бир, ону заводлагъа тапшурагъанда юзюмчюлеге кёп четимликлер тувула. Оланы кёбюсю чагъыр этеген жураларын чачса да, бир боюнда ашайгъан юзюм де болдуралар. Шо да, орта кюйде алсакъ, 60 минг тонлагъа етише. Къалгъанын ишлетмеге деп заводлагъа тапшурма тюше. Алда йимик уллу хозяйстволаны оьзлени заводлары ёкъ. Шону учун да Дербентдеги, Къызлардагъы ва дагъы да бир нече гиччи заводлар да болдурулгъан юзюмню ишлетмеге етишмей къала. Натижада болдурулгъан мал зая бола ва шону болдурагъан адамланы да ишлемеге гёнгю тая.
Дагъыстанда юзюм болдура­гъанларын айтса, Дербент, Къаягент, Сулейман-Стальск, Магьарамгент, Къарабудагъгент ва Хасавюрт районланы эсгерме тюше.

Хасавюрт районда юзюмлюк­лер 1269 гектар ерде ерлешген, шолардан 1266 гектары тюшюм бере. Жуманы башында Хасавюрт районну юрт хозяйство управлениесини ёлбашчысы Идрис Загьалов ва район жыйынны депутаты Руслан Сайитбеков Новогагатли юртгъа баргъан ва юзюм жыягъанлар булан ёлукъгъан. Оьз есликдеги «И.Гьажиева» ва «Т.Хасаев» къурумлар юзюм жыйывун орталап тура. Оланы 100 ва 223 гектар ерде юзюмлюклери бар. Бугюнлеге ерли гьар гектардан 170-180 центнер алып туралар.

–Бу йыл юзюмчюлер учун къыйын йыл болду, – дей Идрис Загьалов. – Янгурсуз оьтген гюнлер аз йимик, борлалагъа аврувлар да тийип, шолагъа къаршы чаралар юрютмек учун да гьаракат этдик. Гьали болдурулгъан тюшюмню заманында къайтармакъ учун гьаракат этиле. Сентябр айны ахырына районда юзюм жыйывну битдирме къаст этебиз.

Авторизация
*
*
Регистрация
*
*
*
Согласны с условиями сайта?
Генерация пароля