Бу йылны апрель айында башлангъан, Бабаюрт –Гребенская деген ёлдан тутуп, районну Гьасанай юртуну ичине барагъан 5 чакъырым узунлугъу булангъы ёлну 4 чакъырымына асфальт тутулуп битген. Ёлну ахырынчы чакъырымындагъы ишлени бу айда тамамланмагъа гёз алгъа тутулгъан.
Ери гелгенде, артдагъы 4 айны ичинде «Нарт» деген къурумну къуллукъчулары оьзлеге тапшурулгъан ишни оьр даражада кютгенни эсгермеге ярай. Ёлгъа тутулагъан асфальтны сан яны яхшы болсун учун, ёл къайыр аралашгъан чакъа таш тёгюлюп гётерилген, тюзленип, басылтып тегишленген.
Эсгерилген юртну ичиндеги бу уллу орам бек бузукъ гьалда эди. Айрокъда гюз-къыш айларда юртну халкъына, машин гьайдавчулагъа да орамдан оьтмеге бек четимликлер тува эди. Оьзлени четим гьалларын айтып, гьасанайлылар къувун гётерегени де он йыллардан къолай бола. Амма оланы тавушун эшитегенлер ёкъ эди. Заманлар алышынып, Бабаюрт районну башы болуп Даниял Исламов белгиленген сонг, ишлер еринден тербенди демеге ярай.
Ери гелгенде, бу йыл Бабаюрт районда «Мени Дагъыстаным – мени ёлларым» ва «Ерли сиптечилик» деген программалар да яшавгъа чыгъарылып турагъанын эсгермеге тюше. Гьакъыкъатда районда йылны ахырына дагъы да 6 юртда умуми кюйде 6,5 чакъырым узунлугъу булангъы 7 орамгъа асфальт тутулажакъ.
