Алдагъы гюнлерде Буйнакск районда пагьмулу яшлар булан иш юрютеген центрында эсгерилген муниципал къурулувуна 100 йыл битегенликге байлавлу юрюлеген конкурсну экинчи тирети оьтгерилген.

Торайып гелеген яш ­наслуну тувуп оьсген элини, ата юртуну тарихине тергевюн бакъдырмакъ ва ахтармагъа иштагьландырмакъ муратда юрюлеген шо конкурсда яшланы яратывчулукъ ишлерине къаралгъан.

Буйнакск районну билим берив управлениесини Telegram-каналында билдирилегени йимик, яшланы ахтарыв ишлеринде бугюнлерде Украина бойда юрюлеген хас асгер гьаракатгъа къуршалгъанланы, олай да гьар юртдан чыкъгъан гёрмекли ишлер этип белгили болгъан адамланы къысматына айрыча агьамият берилген. Шондан къайры да, яшлар туристлер гьисапда гелеген къонакъланы иштагьландырмагъа болагъан ата юртуну табиатыны гёзел ерлерин де малим этген.