Артдагъы вакътилерде бизин яшланы кёбюсю оьзлени юреги авагъан спортну гьар тюрлю журалары булан машгъул болуп геле. Шолайлыкъда, бир тюрлю уьстюнлюклеге етишгенден къайры да, олар оьзлени савлугъун беклешдирегени де сююндюре.
Гиччи чагъындан спортгъа къуршалгъан яшланы сыдырасына Алишер Оьтемишевни де къошмагъа болабыз. Ол – Тамазатёбедеги Абдулла Байтемировну атындагъы орта школаны 6-нчы класыны охувчусу. Эсгерилген школада спортну ва бокс жураларындан иш гёреген секцияларында жанлы кюйде ортакъчылыкъ эте. Янгыз охув ожакъны оьлчевюндеги ярышларда гюч сынап къоймай, ол район ва республика даражада болагъан ярышларда да алдынлыкъ алып къайтгъан.
Шолай, ювукъда, ачыкълашдырып айтгъанда, январ айны ахырынчы гюнлеринде спортну тай бокс журасындан Каспийскиде юрюлген Дагъыстанны чемпионатында да ол оьзюню тенглилерини арасында экинчи ерге ес болуп гелди.
– Мени бу уьстюнлюк булан дазуланып къалмагъа къастым ёкъ. Оьзюм ортакъчылыкъ этежек бары да ярышларда гележекде де алдынлы ерлени алмагъа къаст этежекмен. Спорт булан да арасы бёлюнмейген кюйде машгъул болмагъа хыял этемен, – дей къатарбаш мени булангъы лакъырында.
Гертилей де, къастлы етер муратгъа дегенлей, Алишер яшавунда гёз алгъа тутгъан хыялланы яшавгъа чыгъармакъ учун бары да гючюн салгъан. Айтагъаным, ол гьар гюн низамлы кюйде спорт секциягъа юрюй. Школада оьзюн лап яхшы яш спортчу гьисапда гёрсете. Алишер билим алмагъа да артыкъ гьаваслы экенин аян этип бажара.
Биз де Алишерге ошайгъан къатарбашлар яшланы арасында кёп болсун дей туруп, билим алывда ва спортда огъар дагъы да уьстюнлюклеге ва оьрлюклеге етишмекни ёрайбыз. Алишер Оьтемишевге бары да муратларына етишмеге насип болсун деп айтмагъа сюемен.
