Артдагъы гюнлерде Къарабудагъгент районда Дагъыстанны маданият министрлигини ва Республиканы халкъ яратывчулукъ Уьюню сиптечилиги булан «Яратывчулукъ десант» деген чара оьтгерилген.

Бизге билдиреген кюйде, яратывчулукъ ахшамында А.Къаплановну атындагъы халкъ хору, «Юн булкъа» ва «Чахри» деген фольклор коллективлер, Къарабудагъгентдеги Г.М.Абдуллаевни атындагъы 1 номерли орта школаны охувчулары ортакъчылыкъ этгенлер.

Яратывчулукъ ахшамны барышында къумукъ ва дарги тиллерде ватангъа, тувгъан элибиз Дагъыстангъа багъышлангъан йырлар йырлангъан, шиърулар охулгъан. А.Къаплановну атындагъы халкъ хору «Кьойсув ягъа» ва «Дагъыстан», Жавгьан Абдуллаева агъач къомузда сокъгъан бырынгы къумукъ кюй, Анзор Сулейманов, Патимат Гьусейнова, Гилянханум Агьматова, Абдулазим Наибханов, Жавгьан Абдуллаева, Аскендер Исрапилов бирче агъач къомузну кююне гёре йырлагъан «Сен мени юрегимдесен» деген къумукъ халкъ йыры яратывчулукъ ахшамгъа айрыча ренк бергенни эсгермеге ярай.

Кусум Халилованы чебер ёлбашчылыгъы булан ««Юн булкъа» деген фольклор коллектив къаравчуланы бырынгъы къумукъ юртда юн булкъалар нечик юрюлгенни гёрсетгенлер.

Бу ерде, пандемия булан байлавлу болуп, «Яратывчулукъ десант» онлайн-къайдада оьтгерилгенни эсгермеге тюше.