Буйнакск районну Янгы Къумукъ юртуну китапханасында, Дагъыстан АССР-ни 100 йыллыгъына байлавлу болуп, «Музейде селфини гюню» деген акция оьтгерилген.

Бизге билдиреген кюйде, шо гюн китапхананы охувчулары, музейге салынгъан тенгсиз экспонатланы алдында шиърулар охуп ва суратлар алып, оланы жамият торларында ерлешдиргенлер. Акцияны къурумчуларыны пикрусуна гёре, шо чара халкъны музейлеге этеген тергевюн артдырмагъа имканлы.

Акцияны къурумчусу, районну баш китапханасыны директору Шагьримат Гьамзатова билдирген кюйде, «селфи» яда оьзю оьзюню суратын алмакъ – оьсюп гелеген яш наслуну аслу машгъуллугъу.

Ону сёзлерине гёре, яшёрюмлени шо машгъуллугъун Дагъыстан АССР-ни 100 йыллыкъ юбилейи булан байлай туруп, оланы Дагъыстанны тарихине тергевюн бакъдырмагъа да бажарылгъан.

Гертилей де, шо гюн китапханагъа кёп санавда яшёрюмлер жыйылма да жыйылгъанлар ва олар дагъыстан шаирлени ва язывчуланы асарларын охугъанлар, китапланы алдында оьзлени суратларын алгъанлар.

Акцияны ахырында ону ортакъчылары, бары да бир ерге жыйылып, ортакъ суратлар да алгъанлар.