Ватанны Игитлерин сыйлайгъан гюн: Закир ДАВУТОВ

Сержант Закир ДАВУТОВНУ аты Оьр Къазанышда даимликге сакълансын учун, юртлулары ону ташдан этилген эсделиги юртгъа гирип гелеген ерге салынгъан. Шо тёбечик ерде Уллу Ватан давну ортакъчыларына салынгъан бирдагъы эсделик де бар.

Закир Давутов 1998-нчи йылда армиягъа чакъырылып, 1999-нчу йылда Мычыгъыш Республикагъа йибериле. Шондагъы дав агьвалатланы вакътисинде Шали районда 1999-нчу йылны декабр айыны 29-ндан 30-на чыгъагъан гече, бандит группалар булангъы урушларда гёрсетген къоччакълыгъы учун огъар Россияны Игити деген ат берилген. Закир Давутовгъа шо гечеги ябушувлардан эртенине эсен-аман чыкъма буюрмагъан. Ол дюньядан гетсе де, аты даимликге эсде сакълана. Орта билим алмакъ учун охугъан школагъа ону аты къоюлгъан.

Асгерде къуллукъ этме гетгинче Закир Давутов Къалмукъ Республикада яшай болгъан. Шону учун да огъар Къалмукъ Республиканы халкъ Игити деген ат да берилген.

Элиста шагьардагъы Игитлени аллеясында оьркъазанышлы Закир Давутовгъа эсделик де салынгъан.