Вагьап Абдулгьамидов: «Агъачлыкъланы толумлашдырмакъ – аслу борчубуз»

Топурагъындан эсе таву-ташы артыкъ Дагъыстанда агъач байлыкъларыбызгъа гьюрметли янашыв, озокъда, гьар къайсыбыз учун да сыйлы борч болуп токътай.

Белгили болгъан кюйде, бизин республикабызда ДР-ни орманчылыкъ комитетини гьисабында гьалиги заманда умуми майданланы къадары 450 минг гектарлардан да кёп болса да, тек шону 365 гектарындан къайры ери бош майданлар. Демек, гележекде шо майданланы да орман ва емиш тереклер булан толумлашдырыв да жаваплы борч.

Бугюнлерде Магьачкъалада «Дагъыстан» деген республика маълумат агентлигинде оьтгерилген ДР-ни орманчылыкъ комитетини башчысы Вагьап Абдулгьамитовну прес-конференциясы да шолай агьамиятлы темагъа багъышлангъан эди.

Гюнлюк низамгъа салынгъан «Агъач байлыкъларыбызны къоруп сакълавну, тас этивлеге ёл бермей толумлашдырывну ва асувлу кюйде пайдаландырывну гьакъында» деген масъалагъа байлавлу болуп эсгерилген къурумну председатели генг кюйде маълумат берди.

– Гертиден де, гьалиги заманда янгыз бизин коллективни алдында тюгюл, бары да дагъыстанлыланы – уллу булан гиччини, пачалыкъ, гьакимият ва жамият къурумланы алдында агъачлыкъ байлыкъларыбызны къысматын къыйыкъсытмай майданларын дагъы да артыкъ этип толумалашдырмакъ аслу борч. Агъачлыкълагъа дюньяны оьпкелери деп негьакъ айтылмагъан. Уьстевюне, агъачлыкъ бизин гелеген балагьлардан къоруп сакълай, исив ва азыкъ бере. Шо гьакъда унутсакъ гележегибиз нечик болажагъы англашыла. О саялы да гьалиги заманда экология культураны болдурмакъ учун теренден ойлашмагъа ва асувлу чараланы гёрмеге тарыкъ болажакъ.

Вагьап Магьамматович аянлашдыргъан кюйде, шогъар да къарамайлы бу йыл комитетге гиреген агъачлыкъларда 3 от тюшюв болгъан ва 17 гектар майдандагъы бир ва кёп йыллыкъ оьсюмлюклер зайыплангъан.

Шо кёпмю яда азмы? 2021-нчи йыл булан тенглешдиргенде кёп. Неге тюгюл де, оьтген йыл 2 гезикде от тюшюп 3 гектар майдан заралгъа тарыгъан болгъан. Тюзю, 2020-нчы йыл булан тенглешдиргенде шо кёп тюгюл. Прес-конференцияда малим этилгени йимик 2020-нчы йылда болгъан 15 от тюшювлени натижасында 196 гектар майдандагъы оьсюмлюклер йимик жан-жаныварлар да заралгъа тарыгъан.

Озокъда, от тюшювлени себеплери де башгъа-башгъа. Шону учун, уьстде де эсгерилгени йимик, комитетни къуллукъчулары, касбучулар гьалиги заманда гележекни де гёз алгъа тутуп ерли муниципал къурулувлары,  орта ва оьр билим береген хас охув ожакълар ва шолай да тармакъ министерликлер булдан байлавлукъда иш гёрмеге токъташгъан.

Вагьап Абдулгьамитов журналистлер берген кёп къадардагъы соравлагъа да жаваплар къайтарды.
Шону учун гележекде де агъамиятлы масъалагъа байлавлу болуп «Ёлдашда» генг кюйде маълумат бермеге умут этиле.