Ноябр айны 24-нде Магьачкала шагьарда «Россия моя история» деген тарихи музейде «Украина – девюрлерде» деген выставканы ачылыву болду. Шону алдында музейни директору Тимур Велиханов журналистлеге выставканы гьакъында айта туруп ону материалларыны кёплери биринчилей гёрсетилегенни эсгерди.

Шолай да, эсгерилген выставканы къурувда гьалиги заманны шартларына гёре мультимедиа технологиялар къоллангъан. Шонда Россияны ва Украинаны бырынгъы заманлардан бугюнлеге ерли аралыкъларыны гьакъында тарихи маълуматлар гёрсетиле.

Журналистлеге Новороссияны тарихини «Украина» деген сёзню амалгъа геливюню ва гьар тюрлю вакътилерде славянланы халкъларын ­айырмагъа къаст этген кюйлени гьакъында да эсгерди. Сонг да, Уллу Ватан давну йылларында Украинаны немис-фашист елевчюлерден азат этилгенини ва Украинада Россиягъа къаршы гьаракатлар башлангъан вакътилени гьакъында да айтылды.

Выставкада Украинада гьалиги вакътиде къолланагъан охутув китаплар, карталар, плакатлар ва архив документлер де гёрсетилген.
Выставканы гьакъында айта туруп, ДР-ни маълумат ва печать агентлигини ёлбашчысы Абдуразакъ Жамалутдинов булай деди:

–Выставкада Украинаны тарихи алышынагъаны ва къайсы агьвалатлар шогъар таъсир этгени мекенли кюйде гёрсетилген. Артдагъы вакътилерде Украина фашизмге ювукъ гючлени таъсирине тюшгенни гёребиз. Выставканы агьамиятлыгъы гёрюнюп тура. Гьар ватандаш тарих агьвалатланы ва маълуматланы билмек учун мунда оьзлер гелип гёрмеге герек.
Магьачкъалада выставка ноябр айны 24-нден башлап, 14 гюн юрюлежек.

Патимат БЕКЕЕВА.