Алдындагъы гюнлерде Буйнакск шагьарны школаларында 11-нчи класларда билим алагъан оьз ана тилиндеги асарланы чебер кюйде охувгъа гёре яшланы арасында ярыш болду. Шону аслу мурады – ана тиллени очагъыны отун сувума къоймай сакъламакъ, охувчуланы тилге усталыгъын, дилбарлыгъын артдырмакъ, яшланы пагьмулуларын арагъа чыгъармакъ.

Тюзю, бу тайпа тил конкурслар гьалиги заман ана тиллеге яшланы гьаваслыгъын гётермеге бир къадар болушлукъ этеген къуралланы биридир.
Мен оьзюм гьисап этеген кюйде, гьакимиятны янындан ана тиллени сакълавну ёлунда таман къадарда таъсир аз. Яшлар бавларында, сонг мактапларда ана тиллени гечив гёземелик учун юрюлеген даражагъа чыгъып битди деп айтмагъа ярай. Янгыз шагьарларда тюгюл, энни юрт ерлерде де яшлар ва жагьиллер ана тилинде гьаран сёйлейген болуп тура. Бу гьакъда ортагъа салып ойлашмагъа, сёйлемеге тюшеген масъалалар да кёп.

Болса да, ана тиллеге байлавлу арада-ягъада дегенлей оьтгерилеген ишлени гёргенде, сююнмей болмайсан. Неге? Неге тюгюл, шолар яшлагъа ана тилни «татывун» билмеге аз-кёп буса да таъсир эте.

Гьали оьрде аты тутулгъан тил ярышда 9-нчу школаны 11-нчи класыны охувчу къызы Фарида Отарова 1-нчи ерге ес болма бажаргъанын сююнч булан эсгермеге сюемен. Уьстюне милли опуракъ гийип ол шиъру охугъан кюй, гертиден де, макътар йимик эди. Ол энни Буйнакск шагьарны атындан республика оьлчевюнде Магьачкъалада болажакъ тил-охув ярышында ортакъчылыкъ этмеге тарыкъ.