Тарихибизни таъсирли тархы
Къызылюрт шагьарда да Октябр инкъылапны 105 йыллыгъына багъышлангъан чара оьтгерилди. Администрацияны жыйынлар юрюлеген залында КПСС-ни ветеранлары, ватандашлар ва жамият чалышывчулар жыйылгъан эди.
Устархан Алюковгъа сёз берилгенде, ону сагьнагъа чыгъышын мунда жыйылгъанлар харс урувлар булан къаршылады. Устархан Шарапутдинович Октябр инкъылапны гьакъында залда жыйылгъанлар булан маъналы лакъырлашыв оьтгерди, о замангъы ва гьалиги яшавну тенглешдирип сёйледи. Оьзюню сёйлевюнде ол дагъыстанлы игит уланларыбыз-инкъылапчылар Уллубий Буйнакскийни, Жалалутдин Къоркъмасовну гьакъында мисаллар гелтирип хабарлады.
Ери гелгенде айтып къояйым, Устархан Шарапутдинович оьз заманында Къызылюрт шагьарда комсомолну шагьар комитетини 2-нчи секретары, партияны шагьар комитетини бюросуну члени ва партия комиссияны председатели, сонг да шагьарны гьакимбашы болуп чалышгъан. Ол не ишде загьмат тёксе де, оьзюне тапшурулгъан борчлагъа тындырыкълы ва жаваплы янашгъан.
Дейгеним, Устархан агъайыбыз тамазаларыбызны ва акъсакъаллыларыбызны арасында бугюн де бизге уьлгю болуп токътай. Ол ортакъчылыкъ этмейген шагьарда бир чара ёкъ десе де ярай.
Бу ерде шулай бирдагъы бир затгъа агьамият бермекни тийишли гёремен. Устархан Алюковну къасткъылыву негьакъ болмагъан демеге ярай. Октябр инкъылапны 105 йыллыгъына багъышлангъан чарада огъар КПРФ-ни ЦК-сыны Гьюрметлев грамотасы тапшурулду. Биз де огъар энниден сонг да жамият чалышывчуну ёлунда оьрлюклер ва уьстюнлюклер ёрайбыз.
СУРАТДА: чарадан гёрюнюш.
Автор чыгъаргъан сурат.
