Тар сокъмакъдан – уллу ёлгъа

Бугюнлерде бизин рес­публиканы бары да билим берив ожакъларында бирдагъы бир охув йыл тамамланды. Школаны битдирип чыгъагъан яш уланлар ва къызлар учун ахырынчы зенг къагъылды.

 

Гьар йыл да мердешленип гелеген кюйде, ахырынчы зенг къагъывгъа багъышлангъан шо шатлыкъларда орта школаны битдирип чыгъагъан­лардан къайры да, олагъа мугькам билим ва тийишли тарбия бермекни къастын болдургъан муаллимлери, ата-анасы, гьакимлик къурумларыны вакиллери, кёп санавдагъы оьзге къонакълар ортакъчылыкъ этди. Шо гюнлерде школа булан савболлашып, тар сокъмакъдан уллу яшав ёлуна тюшеген яшланы атына алгъышлы, насигьатлы сёзлер айтылды. Шону булан бирге юрекде шатлыкъны ва пашманлыкъны гьислерин тувдурагъан макъамлар, йырлар чалынды.

Оьз гезигинде охувчу яшлар ахырынчы зенгге, яшлыкъгъа, гележекдеги умутлагъа, сююмлю муаллимлеге багъышлангъан шиъруланы охуду. Он бир йылны узагъын­да оьзлени яннавурундан таймай юрюген муаллимлерине ва клас ёлбашчыларына баракалла билдирди.

Дагъыстанны билим беривге ва илмугъа къарайгъан министерлиги малим этеген маълуматлагъа гёре, бизин республикада бу йыл школаланы битдирип чыгъагъанланы санаву 12 мингге етише. Школаны 9 класын битдирип чыгъагъанланы санаву буса 36 мингден де артыкъ. Биз де бу йыл школаланы тамамлап чыгъагъан уланланы ва къызланы къутлай туруп, олагъа бирикген ва аслу пачалыкъ экзаменлени оьр къыйматлагъа берип, юрегине тутгъан бары да муратлагъа етишмекни ёрайбыз. Школада алгъан билимлеригизни, муаллимлер, ата-аналар берген насигьатлагъа амин къалып, савлукъ булан санлы кюйде яшамагъа сизге насип болсун!

 

Н. БАЙБОЛАТОВ.

 

Авторизация
*
*
Регистрация
*
*
*
Согласны с условиями сайта?
Генерация пароля