Дагъыстан Республиканы Гьукуматыны Председателини орунбасары Нариман Абдулмуталибов оьтгерген генгешде аслу гьалда сугъарыв масъалалагъа къаралды.

– Федерал программаларда ортакъчылыкъ эте туруп, бизин кёп-кёп сугъарыв масъалаларыбыз чечилди. Шо буса юрт хозяйствону ишлерин бир даражагъа гётерди, тек дагъы да этме кёп ишлер бар, – деди Н.Абдулмуталибов.

Вице-премьер артдагъы йылларда арагъа чыкъгъан Къызлар ва Бабаюрт районлардагъы гёчювюл хозяйстволаны топуракълары бузулуп турагъанны, шо бойларда хозяйствоара татавуллар тазаланмайгъанны ва сув бермек учун къоллангъан электрик токну харжы жыйылмайгъанны да эсгерди.

Сув хозяйство министерлигини ёлбашчысы Залкип Къурбанов гележек 6 йылны ичинде 13, 901 миллиард манат харж этип, 17 сугъарыв имарат къурулажакъны айтды. Шо буса 196 минг гектар ердеги ашлыкъланы, бавланы, борланы ва башгъа тюрлю оьсюмлюклени сугъарма имканлыкъ бережек.

Генгешде Дагъыстанны юрт хозяйство ва сурсат министри Мухтарбий Ажеков, Балыкъчылыкъгъа къарайгъан комитетни ёлбашчысы Виктор Руденко, юзюмчюлюк тармакъны комитетини ёлбашчысы Шериф Керимханов гьалгъа гёре оьзлени ойларын айтдылар.