Шатлыкъ булан къаршыладылар

26 ноября 2022 в 13:51 132
Алдагъы гюнлерде Бабаюрт районну Хамаматюртунда щатлы чара оьтгерилди. Шо гюн юртлулар оьзлени игити, Россияны Савутлу Гючлерини капитаны, 8 айны узагъында хас дав чараларда ортакъчылыкъ этген Элдар Къанболатовну уллу гьюрмет булан къаршыладылар.

Ол юртну гьакимлери онгаргъан къаршылавдан сонг, юртну маданият къаласында къурумлу кюйде оьзюню гьюрметине байлавлу болуп оьтгерилген шатлы байрам чарада ортакъчылыкъ этди.

Жыйылгъанланы алдында сёйлеген юртну башы Амир Къазанбиев, Элдаргъа разилик ва баракалла билдире туруп, огъар савлукъ, энниден сонг да Ватаныны алдындагъы борчларын намуслу кюйде кютмекни ёрады.

Оьзюн онча да исси къаршылагъангъа гьайран болгъан Элдар, юртлуларына гьакъ юрекден баракалла билдире туруп, оланы янындан якълав гьис этегенни билдирди.

– Биз бир болсакъ, бизге биревню де гючю етмес, тюзлюк бизин яныбызда, биз утажакъбыз. Этген гьюрметигиз, исси сёзлеригиз саялы кёп сав болугъуз, – деди ол.

Охувчу яшлар оьтгерген гиччирек концерт программаны да эсгермеге сюебиз. Онда олар патриот темагъа ва Ватанны якълавчуларына багъышлап шиърулар охудулар, йырлар да йырладылар. Шатлыкъланы ахырында жыйылгъанлар юртлу игит булан суратлар да алдырдылар.

Герейхан ГЬАЖИЕВ.
СУРАТДА: ёлугъувну барышы.