Артдагъы вакътилерде бизин республикабызны базарларында ва тюкенлеринде оьзге тюрлю сурсат малланы йимик Дагъыстанджа да ернтюп емишлени багьалары гьатдан озуп барагъаны тергевню тартмай болмай.
Шогъар байлавлу болуп тёбенде ДР-ни юрт хозяйство ва сурсат министри Шарип Исмайыловыи Шарипов оьз баянын бере.
Гертиден де, экмекден сонг картоп бизин аш тепсилерибизни берекетин гёрсетеген лап да кёп къолланагъан сурсат буса, озокъда, шону оьсдювюге де сыйлы ва жаваплы кюйдеги янашыв болмаса бажарылмайгъаны гьакъ.
Шону гьалиги заманда бизин базараларда ва тюкенлерде гьатдан озуп артыкъ болуп турагъан багьалары да ачыкъ этип гёрсете. Июн айда ону гьар килосуну багьасы гьатда 40-50 манатлагъа чыгъып гетеген гезиклери де болду. Марковну багьасы чы, 100 манатлагъа да чыгъып гетди. Неге десегиз, картопну ва оьзге тамур емишлени багьасы учуз болгъан къапустаны йимик топуракъгъа чачып оьсдюрмек тынч масала тюгюл.
Гьалиги заманда бизин республикакбызда картоп оьсдюрюлеген майданлар 18 минг гектарлагъа етише демеге ярай. Шо кёпмю яда азмы деген сорав тувулуна. Озокъда, айлана якъда артып тербейген къоллавчуланы талапларын гьисапгъа алгъанда аз. Шолайлыкъда, картопну ва оьзге ертюп емишлени багьалары да айлана якъда алывчуланы хапмагъа башлай.
Яшырмагъа тарыкъ болмай, шолай гьалдан къоллавчуланы ва мал болдурувчуланы арасында гирип оьз пайдасына чалышагъан ломмайчылар ва арадачылар (оптовики, посредники) багьаланы иш этип гётермеге муштарлы болагъаны англашыла.
Шону алдын алмакъ учун ДР-ни юрт хозяйство ва сурсат министерлигини янындан да алгъасавлу кюйде чаралар гёрюле. Айтмагъа сюегеним, бугюнлерде картопну янгы тюшюмю базарлагъа ва тюкенлеге сатывгъа чыгъарылып тура. Шо да багьаланы бир къадар ёрукъгъа салма кёмек этер деп айтмагъа ярайдыр.
Буса да, бугюнню тангласы да бары гьакъда да теренден ойлашмасакъ бажарылмай. Гьалиги заманда бизин республикабызда оьсдюрюлеген картопнуц 80 процентден артыкъ пайы къошум кёмекчи агьлю хозяйстволаны (ЛПХ) гьаракаты булан болдурула. Дагъы да ачыкълашдырып айтсакъ, картопну 40 процентден къолай пайы бизин респуб ликабызда Акъуша, Лаваша, Буйнакск районларда оьсдюрюле десек де гьакъыкъатгъа къыйышмай къалмас.
Арт вакътилерде Дербент районда картопну уллу майданларда оьсдюрме гёз алгъа тутгъан уллу коллектив къайдада загьмат тёгеген предприятиелер де арагъа чыгъагъаны гележек учун инакмлыкъны тувдура.
Озокъда, шону учун бизин республикабызда сайламлы урлукъ материалны болдурувдан да кёп зат гьасил болагъаны гьакъда унутмайлы ертюп емишлени Дагъыстанда оьсдюрюлеген хайырлы жураларын янгыдан яшавгъа къайтармагъа тюше. Шолайлыкъда, ишсизликни алдын алып дегенлей, юрт хозяйство агьамияты булангъы топуракъларыбызны алдагъы йимик уллу майданлардла янгыдан пайдаландырмагъа имканлыкълар да артажакъ.Узун сёзню къысгъасы, биз республикабызда юрт хозяйство топуракъланы картоп ва оьзге ертюп емишлер оьсдюрюлеген майданларын белгили кюйде артдырмасакъ тышдан ташылып гелтирилеген картоп ва оьзге тюрлю авлакъ ниъматлар къоллавчулар учун учуз токътамажакъ.
