Адатлангъан йимик, бу йыл да Дагъыстанны Башчысы Сергей Меликов, ЕГЭ-ден 100 бал алгъан, Бютюнроссия олимпиадаларда уьст гелген выпусниклер ва оланы насигьатчылары булан ёлугъув оьтгерип, 31 яшгъа 100 минг манатны къадарында шагьатнамалар берди.

Ери гелгенде эсгермеге сюемен, 2021-нчи йылда Дагъыстанда ЕГЭ-ден 100 бал алгъанлагъа бермеге деп республиканы бюджетинден савгъат гьисапда 100 минг манат акъча токъташдырылгъан эди. Гетген йыл шо шагьатнамаланы школаны битдирген 49 яш алгъан эди.

–2022-нчи йыл республикабызда Билим беривню йылы деп юрюле. Сизин ­уьстюнлюклеригиз де бу йылгъа къыйышывлу гелегени сююндюре, – деп башлады Сергей Меликов, шатлы жыйынны ача туруп. – Бугюн буса мсизге башгъа дазулардан оьтмеге, дагъыдан да четим масъалаланы чечмеге, гьалиги заманны къыйынлыкъларына сесленмеге тюшежек. Сиз шогъар гьазир турмагъа герексиз. Сизин наслуну гючю – эркин кюйде ойлашагъаныгъызда, янгылыкъланы таклиф этивде.

Къайсы оьрлюклерде де шекленивлер тувулунмай, хаталар, тюзелмегенлик болмай къалмай. Нелер болса да, артгъа тайышма, гёнгюлден тюшмеге, къайпанмагъа ярамай. Шо сизин учун бек агьамиятлы. Илмуда, инчесаниятда, спортда оьзюгюзню гючюгюзге инанма герексиз. Биз, уллулар, яннавуругъузда турабыз, сизин учун ишлейбиз, сизин булан бирче Ватанны талайы учун чалышарбыз. Мен гьаригиз дагъы да оьрге гётерилежегигизге инанаман. Сизге янгы ­уьстюнлюклер ёрайман, – деп битдирди сёзюн Дагъыс­танны Башчысы.

Шо шатлы агьвалатда Дагъыстанны билим беривюню ва илмуну министрини заместители Айида Далгьатова насигьатчылар-педагоглар охувчуланы гьаракатына нечик къошум этгенни гьакъында айта туруп булай эсгерди:

– Оьр уьстюнлюклер – бары да халкъны ортакъ къыйынлары: сизин ата-анагъызны, муаллимлеригизни. Амма сиз унутмагъыз, загьмат тёкмей туруп, натижалагъа етишмеге бажарылмай. Къаныгъывлу кюйде къасткъылгъаныгъыз, пагьмуларыгъыз булан яшавугъузда дагъы да оьр даражалагъа етишмекни ёрайман.
Оьз арасында юрюлген лакъырда Сергей Меликов охувчуланы гележекдеги планлары гьакъда сорагъан. Оланы кёплери гьукуматыбызны айтылгъан оьр охув ожакъларында охума сюегенни айтгъанлар. ­Дагъыстанны Башчысы, кёп уллу муратланы гёз алгъа тутгъан яшлагъа разилигин билдирип, шо алгъан билимлерин гележекде Дагъыстанны тюрленивю учун пайдаландыражакъгъа умут этегенин билдирди.

Ёлугъувда Дербент ­райо­нну Хазар орта школаны выпускниги тарихден ЕГЭ-ден 100 бал алгъан Магьамматсайит Рамазанов С. Меликовгъа оьзю экзаменге гьазирленген кюйню хабарлады.

– Мен шо хыялларымны яшавгъа чыгъармакъ учун мекенли кюйде гьаракат этген эдим. Шо алгъа багъып талпынагъанлыгъымны натижасы болажакъны англай эдим. 100 бал алгъан сонг, нечакъы къыйын ишни ахырына чыкъмагъа бажарылагъангъа мюкюр болдум. Гьарибиз алгъан билимлени, сынавланы къоллап, ­Дагъыстанны гележегин оьсдюрмеге герек деген ой булан мен де разимен.

Шонда ингилис тилден Бютюнроссия олимпиадада савгъатлы ер къазангъан Патимат Саметова да оьзюню пикруларын ачыкъ этди.
– Мен 4-нчю класдан тутуп гьар тюрлю предметлерден олимпиадада ортакъ­чылыкъ этип гелгенмен. Оьзюмню гьаракатым, гьазирленивюм булан Бютюнроссия олим­пиа­дада савгъатлы ерни къа­занмагъа насип иржайды, – деди ол. Ол Сергей Меликовгъа яш ­наслуну якълайгъаны учун баракалласын билдирди, дагъы да уьстюнлюклеге етишме гьаракат этежекге сёз берди.

Бютюнроссия олимпиадада алдынлы сыдырагъа гирген Патимат Саметованы насигьатчысы, ингилис тилден дарс береген Айида Абдуллаева бугюн шо залгъа жыйылгъан яшланы кёмеги, къошуму булан Дагъыстан Россияны ичинде алдынлы республикалардан болажа­гъына инанагъанын белгиледи.
Бу ёлугъувну ахырында С. Меликов гьарисине 100 минг къадарда шагьатнамалар тапшурду.

Паху ГЬАЙБУЛЛАЕВА.