Сергей МЕЛИКОВ: «Ишни санавлар булан дазуламагъа тюшмей"

25 ноября 2022 в 14:10 60
Гьар йыл адатлангъан кюйде, къышлавну алдында республикабызны яшавлукъ-коммунал къулллукъларыны жаваплы кампаниягъа гьазирлигине байлавлу болуп гьисап берив жыйынлар оьтгериле. Гьали де ДР-ни къурулуш ва яшавлукъ-коммунал министерлигини генглешген жыйын­ында шо масъалагъа байлавлу генг кюйде гьакълашыв, пикру алышдырыв болду.

Эсгерилген министерликни  башчысы Артур Сулеймановну гьисап беривюне гёре, республикадагъы шагьар ва шолай да юрт муниципал къурулувларында къышгъа гьазирлик гёрюв толу экени гьакъда баян этилди.

Шонда бизин республиканы башчысы Сергей Меликов да жыйында ортакъчылыкъ этген гьар тюрлю оьлчевдеги гьакимлени гьисап беривлерине тынглады.  Сонг  къоллавчуланы къуллукъларын кютеген объектлени вакиллерине жаваплы борчланы яшавгъа чыгъарывда янгыз санавлар булан дазуланмагъа тюшмейгени гьакъда айта туруп оьз пикруларын арагъа чыгъарды.

– Сёзден, санавлардан ишге гёчмек агьамиятлы, – деди Сергей Алимович ­оьзюню сёйлевюнде. – Болма имканлы гьар тюрлю хатабалагьларда къышлавну вакътисинде къыставуллу гьаллар тувулунма болагъаны гьакъда унутма тюшмей. Шону учун да биз къоллавчуланы артагъан талапларын гьисапгъа алып, айрыча гьазирлик гёрмесек бажарылмай. Къыш айларда исив беривде газчыланы ва электриклени борчлары артагъаны гьакъда да унутмагъа ярамай.

Къ. КЪАРАЕВ.