С.Меликов байрам чараларда ортакъчылыкъ этген

6 мая 2022 в 16:34 36

30-нчу апрелде Дагъыс­танны Башчысы Сергей Меликов Каспийск шагьарны майданында оьтгерилген «Уьстюнлюкню Байрагъы» деген гьаракатда ортакъчылыкъ этди. Ол жыйылгъанланы Уьстюнлюкню гюню булан къутлай туруп, 9-нчу Май халкъны байрамы ва шону булан бирге гьар агьлюге къайгъы гелтирген немис-фашист елевчюлени дагъытгъан гюн экенни айтды.

 

– Уллу Ватан давда 180 минг дагъыстанлы ортакъчылыкъ этген ва Сталинградны, Москваны, Ленинградны якълайгъанда, Курск бойдагъы къагьрулу давларда ортакъчылыкъ этген. Сонг немислени Берлинге ерли къувалагъан ва Рейхстагны тёбесине Уьстюнлюкню байрагъын къакъгъан. Шолардан бириси – бизин якълы, Россияны Игити Аб­дулгьаким Исмайылов. Оланы игитлигин давам этеген дагъыстанлы уланлар бугюнлерде Украинада миллетчиликге къаршы дав гьаракатларда да ортакъчылыкъ эте.

Ондан сонг сёйлегенлер де оьтген заманны ва гьалиги девюрню аралыгъын уьзюлме къоймай, жанын-къанын тёкген уллу аталарыбызны эсделигин сакълама гереклигин айтдылар.

Шондан сонг шагьарны майданында парад болду. Онда асгерчилени парады, машинлени юрюшю оьтгерилди. Сав гюн дегенлей шагьарда дав йылланы йырлары йырланып да турду.

 

* * *

Дагъыстанны Гьукуматыны башчысы Абдулмуслим Абдулмуслимов Табиат ва экология министерлигини жыйынында ортакъчылыкъ этди. Аслу гьалда ол нас ва гесек-пусакъны ташлайгъан, шо­ланы сайлап айырагъан ва ишлетеген ерлер мекенлешмегенни гьакъында айтды.

Ондан къайры да, йыллар булан нас тёгюлюп тургъан Хасавюрт, Каспийск, Буйнакск и Южно-Сухокумск шагьарланы айланасында­гъы чёплюклени бир амалгъа гелтирме герекни гьакъын­да да эсгерди.

Гележек 2 йылны ичинде Хумторкъали, Дербент ва Хасавюрт районларда нас­ны ишлетеген заводланы проектлери тамамланып, сонг шолар къурулма башлажакъны гьакъында да айтды.

* * *

 

Сергей Меликов Украинада хас асгер операцияны оьтгерегенде къоччакълыкъ гёрсетген Марат Халиковгъа ва Ибрагьимхалил Гьажиевге «Дагъыстан Республиканы алдындагъы къуллукълары учун» деген орденлер, Рос­гвардияны къуллукъчуларына Амет-хан Солтанны атындагъы «Яшёрюмлени патриот ругьда тарбиялавда этген къошуму учун» деген медаллар берди.

* * *

Дагъыстанны Башчысы Сергей Меликов бусурманланы сыйлы Ораза байрамы булан къутлады.

* * *

Дагъыстанда электрик гючлени болдурув аслу ер­ни тута ва бары да ишлени къуршай. Гетген йылны ахырына Дагъыстанда уллу-гиччи 19 электрик станция ишлей. Шолар 1905,13 МВт ток болдура. Шо санав геле­жекде дагъы да сегизге артмакълыкъ бар.

Энергетиканы министрини заместители Магьаммат Алибеков айтагъан кюйде, янгы электрик станцияланы гючю 500 минг адамны ток булан таъмин этме болажакъ, шолай да 200 адамгъа иш ерлер де ачылажакъ.

 

Бизин маълумат.