Жуманы аслу темасы Россияны Президенти Владимир Путинни бир гьавур асгер къуллукъгъа чакъырывну гьакъында билдиривю булан байлавлу. Россияны ватандашлары учун о бек агьамиятлы деп гьисаплана.
«Гьюрметли къурдашлар! Бугюн мен сизге айтма сюегенимни аслу маънасы Украинада 2014-нчю йылда савутлангъан пачалыкъ алышынывланы (переворот) вакътисинде Украинадагъы гьакимчиликни алгъан неонацист режимден къутгъармакъ учун Донбасда юрюлюп турагъан хас асгер операцияны гьалыны гьакъында болажакъ» – деп башлана Чакъырыв.
Гертиден де, Россияны савутлу гючлери Донбас, Луганск Халкъ республикалагъа асгер кёмек этип юрюйгенли ярым йылдан артыкъ заман гетди. Гьал яхшы янына алышынмады. Шогъар гёре Россияны Президенти Чакъырывунда о республикалардагъы гьалны эсгере:
«Луганск Халкъ Республикасы неонацистлерден толу кюйде азат этилген деп айтма ярай. Донецк Халкъ Республикада давлар юрюлюп тура. Онда Киевни елевчюлюк режими бек къаст этип, бекликлер къуруп олтургъан. Биз туврадан уруп оланы ёкъ этме де болар эдик, тек о заман халкъ къырылмакъ бар. О саялы да бизин асгер бёлюклер Донбас республикаланы асгер бёлюклери булан асталыкъда, усталыкъда техниканы да къоллап, бизин якъдан тас этивлени де гёз алгъа тутуп, абатдан-абатгъа алгъа бара туруп шагьарланы, посёлокланы неонацистлерден тазаламакъны гёз алгъа тутуп, халкъны гьайын этип иш гёре.
Сиз де билеген кюйде, хас асгер операцияда дыгъар этип касбучу асгер къуллукъ кютегенлер ортакъчылыкъ эте. Тек олар булан бирче оьзлер сююп къошулгъанлар да бар. Миллетлери, касбулары, йыллары бир-бирине ошамайгъанлардан жыйылгъан группалар да олар булан бирче дав агьвалатларда ортакъчылыкъ эте. Герти патриотлар. Гьакъ юрекден Россияны ва Донбасны якълама сюегенлер.
Шону учун да Гьукуматгъа, Оборона министерликге мени янымдан къысгъа вакътини ичинде оьзлер сююп къошулгъанланы ва Донецк, Луганск халкъ республикаланы асгер къуллукъчуларыны да закон яндан статусларын белгилемек деген буйрукъ берилген. Оланы статус ихтиярлары бары да янындан Россияны армиясында къуллукъ этегенленики йимик болма тарыкъ».
Россияны Президенти бу Чакъырывун да, бизин уьлкеде асгерге къабул этивню «Частичная мобилизация» деген къайдасын къоллавну гьакъында къарар чыгъаргъанын да англагъан эдик. Олай пикругъа гелмек учун дюнья гьаллары арт вакъти нечик алгъасавлу кюйде алышынгъанны да эсгерме тюше. О гьакъда В. Путин Чакъырывунда булай дей:
« Гюнбатышны аслу мурады – бизин уьлкени осаллашдырмакъ, артда да ёкъ этмек. Олар, 1991-нчи йылда Совет Союзну ёкъ этме болгъандай, Россияны да бузма бажарылажакъ деп туврадан айта. Гьали шогъар заман гелген, дей. Мурады – Россияны бир-бири булан оьчлюкде туражакъ бир нече регионлагъа ва областлагъа бёлмек».
Озокъда, олай ойлашмай болгъан буса, НАТО-ну генглешдире туруп Россияны дазуларына ювукълашмас, Украинаны да оьзлеге къошма гьаракат этмес эди.
Чакъырывунда Россияны Президенти булай бирдагъы масъаланы гётере. О да Истамбулда юрюлген сёйлешивлени – разилешивлени гьакъында.
«Генг кюйде эшитилсин деп айтмагъа сюемен. Асгер операция башлангъанда, Истамбулда оьтгерилген сёйлешивлерден сонг Киевден гелгенлер бизин таклифлеге рази болгъан эди. Шолай таклифлер бир башлап Россияны аманлыгъын сакъламакъ учун деген муратда гётериле эди. Гюнбатышны олай гьал рази этмей болгъан экен. Киевге оьрден таба шолай сёйлешивлени яшавгъа чыгъарма тарыкъ тюгюл деген буйрукъ гелген.
Украинагъа дагъы да кёп дав савут йиберме имканлыкълар тапды. Тыш пачалыкълардан гелеген гьакъгъа тутулгъан националистлени, «боевиклени» санаву арта башлады. Олардан НАТО-ну къуллукъчулары уьйретген асгер бёлюклер гьазирленди», – деп эсгере Россияны Президенти.
Набиюлла МАГЬАММАТОВ.
