Буйнакск районну «Патриот» деген охув-тренировка лагеринде Росгвардияны Дагъыстан Республикадагъы управлениесини къуллукъчулары лагерге ял алма гелген яшлар булан уьйретив тренировкалар юрюте. О гьакъда регионну Росгвардиясыны прес-къуллугъу билдире.

Юмурукъ ябушувдан Дагъыстанны чемпиону, спортну асгер самбо деген журасындан устасы, полицияны сержанты Анвар Абукаев, Дагъыстанны эки керен чемпиону болгъан, боксдан спортну устасына кандидат, полицияны старший сержанты Ибрагьим Жаватханов яшлар булан эртенги зарядка оьтгерген ва спортну бир нече жураларындан «мастер-клас» гьюнерлер гёрсетген.

Лагерде ял алагъан яшлар учун уллу таъсир этген бирдагъы башгъа ёлугъувну да эсгерме тюше. Олай адам булан таныш болагъаны яшлар учун бек агьамиятлы. Ол етишген уьстюнлюклени гёзден гечирме къараса да, яшлар хыйлы яхшы хасиятлагъа уьйренежек. Ол да – чакъырылгъан къонакъ, Темиркъазыкъ Кавказда спорт ярышларда инг де кёп савгъатлар къазангъан, асгер самбодан дюньяны 3 керен чемпиону болгъан, спортну ат къазангъан мастери Магьаммат Магьамматов.

Ихтиярлар якълав къурумланы къуллукъчулары булан оьтгереген мюгьлетлер де яш наслу учун бек пайдалы. Олар оьзлени ишини гьакъында да хабарлагъан, яшланы соравларына жавап­лар къайтаргъан. Инг аслусу, Ватанны сюйме де, огъар абур этме де герек экенни англатгъанлар.

Росгвардияны Дагъыстан Республикадагъы управле­ниесини начальнигини кё­мекчиси, полицияны полковниги Константин Шиян билдирген кюйде, булар оьтгереген акцияны аслу мурады – гележек наслуну патриот ругьда тарбияламакъ.