Алдындагъы гюн, 12-нчи апрелде, Дагъыстанны Гьукуматыны Председатели Абдулмуслим Абдулмуслимов республиканы школала-рына янгы автобуслар берилеген шатлы жыйында ортакъчылыкъ этген.

– Бизин охувчу яшларыбызны гюню школагъа барагъан автобусдан башлана, – дей А.Абдулмуслимов. – Автобусланы онгайлыгъындан ва гьалындан яшланы гёнгю де, охуву да гьасил бола деп айтма ярай. Гетген йылны ахырында Дагъыстангъа школалар учун 55 автобус гелди. Бу йыл да шо ишлер давам этиле. Федерал бюджетни гьисабына гелеген шо автобуслар яшланы школагъа етишивюне онгайлыкъ бережекге шеклик ёкъ. Гертиден де, бир-бир школалагъа бармакъ учун яшлар шайлы ёл этелер.

Барыгъызны да шу агьвалат булан къутлама сюемен ва ­оьсюп гелеген яшёрюмлени пайдасына къолланмакъны ёрайман.
Сёз ёругъуна гёре айтсакъ, шу автобусланы алмакъ учун 50 миллион манат федерал бюджетден гёрсетилген. Шо акъчагъа 24 яшгъа ери булангъы 16, 20 яшгъа – 2 ва 12 яш минме болагъан 5 автобус алынгъан. Шолар охувчуланы оьлчевюн ва охувчулар школадан нечик ариде яшайгъанын гьисапгъа алып пайлангъан.
Тапшургъандан сонг автобуслар Ахвах, Акъуша, Гуниб, Дахадаев, Къарабудагъгент, Къаягент, Къызылюрт, Кули, Табасаран, Хунзах ва Хасавюрт районлагъа, шолай да Магьачкъала, Буйнакск, ­Каспийск ва Къызылюрт шагьарлагъа гетдилер.

Шо чарада Дагъыстанны Гьукуматыны Председателини орунбасары Муслим Телякъавов, билим беривню ва илмуну министри Ягьия Бучаев, Дагъыс­танны Халкъ Жыйыныны депутаты Елена Павлюченко, районланы башчылары ва школаланы директорлары ортакъчылыкъ этдилер.

Шолай да, «Билим берив» деген милли программалагъа гёре, бу йыл Дагъыстанда ярашдырылажакъ ва къурулажакъ школаны санаву да алдагъы йылдан хыйлы артыкъ.