Арбагюн, апрель айны 27-синде, Магьачкъаладагъы «Россия – мени тарихим» деген паркда Бютюнроссия илму-сынав конференция ишин башлады. Дагъыстанда билим беривню йылыны оьлчевюнде юрюлеген шо конференцияда бизин уьлкени республикаларында ва оьзге регионларда экзаменлер оьтгеривде топлангъан сынав арагъа салынып ойлашылды. Демек, гьалиги шартланы гёз алгъа тутуп, яшланы билимлерини сан янын тергевню шартларын камиллешдиривню ёллары белгиленди.

 

Ачыкълашдырып айтгъанда, охувчу яшланы йыллыкъ гьасил чыгъарыв аттестациясындан къайры да, шону барышында толгъан ва толмагъан орта билим беривню тармагъында къабул этилген программалар не къадар яшавгъа чыгъарылып турагъаны да малим этилди.  

Оьтгерилген шо конференцияны барышында бизин уьлкени бары да дегенлей регионларындан гелген экзаменлени къурумлу юрютювде мекенли сынав топлагъан касбучулардан къайры да, Рособрнадзорну вакиллери, олай да охувчу яшланы билимлерини сан янын тергев булан машгъул болагъан къурумланы жаваплы къуллукъчулары ортакъчылыкъ этди.

Тергевлени федерал цент­­­рыны ёлбашчысы Юлия Его­рова оьзюню сёйлевюнде охувчу билимлерини гьа­­­силлерин чыгъарывда пай­­­­­даландырылагъан янгы къу­­­ралланы гьакъында да эс­­герди. Шону булан бирге, шо тармакъда топлангъан сы­навун уьйренивге байлавлу оьтгерилеген конференция­ланы ортакъчыларына къошум имканлыкълар яра­­тылагъаны гьакъда да айт­­ды. Пикру алышдырывну вакъти­синде арагъа чыкъгъан соравла­гъа жаваплар да берилди.

ДР-ни билим беривге ва илмугъа къарайгъан минист­ри Ягьия Бучаев де оьз гезигинде шулай даражадагъы илму-сынав конференция бизин республикада биринчилей оьтгерилегени гьакъда айтды. Шулай гьаракатланы гьар йыл оьтгеривню мердешге айландырмакъны агьамиятлыгъы гьакъда айрыча эсгерди. Неге тюгюл, охувчуланы билимлерин тюз къыйматлав, олай да сан янын артдырыв гьали де агьамиятлы масъалаланы бириси гьисаплана.  

 

Н. БАЙБОЛАТОВ.