Дагъыстан Республиканы Гьукуматыны прес-къуллугъу береген маълуматлагъа гёре, бир нече гюн алда Россия Федерацияны тизимине гирген Донецк, Луганск халкъ республикаларда ва Запорожск областда яшайгъанлагъа инсаплы кёмек гьисапда Дагъыстандан ашамлыкъ маллар йиберилген.
Премьер-министр Абдулмуслим Абдулмуслимов эсгерген кюйде, республиканы оьлчевюнде онгарылгъан бу меселли акция регионну Башчысы Сергей Меликовну сиптечилиги булан оьтгерилген. 300 тонгъа ювукъ ашамлыкъ продукцияны 224 тону – Донецк, Луганск халкъ республикалагъа, къалгъаны буса Запорожск областгъа йиберилген. Малланы топламакъ учун Дагъыстанда юрт хозяйство маллар чыгъарагъанланы, сабанчы-фермер хозяйстволаны, юрт хозяйство производство кооперативлени ёлбашчыларыны, олай да оьзбашына далапчылыкъ юрютегенлени ва уллу предприятиелени кёмеги тийген.
Дюгю, ун, эт ва овощ консервалар, ичеген минерал сув, крупа, кондитер маллар, юзюм, овощлар, емишлер ва оьзге продукция – булар бары да гьалиги гюнлерде давлардан талчыкъ гёрген эки де республикалар ва област учун оьз заманында этилеген кёмек. Дагъыстанлылар, оьзлеге хас бу дослукъну ва къурдашлыкъны акциясы булан бирдагъы керен Украинада юрюлеген асгер операцияны ва дёрт де айрыча къурулгъан янгы регионлар референдумланы гьасиллерине гёре Россияны тизимине гиргенни якълайгъанын бирдагъы керен аян эте.
