Арбагюн, апрель айны 20-сында, Дагъыстанны билим беривге ва илмугъа къарайгъан министерлигини генгеши оьтгерилди. Шону барышында оьтген 2021-нчи йылны гьасиллери чыгъарылды. Онда бизин республикада билим берив тармакъны гележекде оьсюв ёллары арагъа салынып ойлашылды.

 Инг алда ДР-ни Гьукуматыны Председателини замес­тители Муслим Телякъавов оьзюню сёйлевюнде билим берив тармакъны ишин камиллешдиривге болушлукъ этмеге болагъан, артгъа сал­май чечмеге тюшеген бир-бир масъалаланы арагъа чы­гъарды. Шоланы арасында охув ожакъланы биналарында ярашдырыв ва янгыртыв ишлени туварып къоймагъа ярамайгъаны гьакъда айрыча эсгерди.

– Охув ожакъланы биналарын ярашдырывгъа ва янгыртывгъа байлавлу прог­­­­раммагъа бизин респуб­ликаны бары да дегенлей юртлары ва шагьарлары къуршалгъан. Шо якъдан юрюлеген гьаракатгъа жамият бирлешивлени ва яшланы ата-анасыны вакиллерини янындан программа не къадар яшавгъа чыгъарылагъангъа тергев этил­меге тарыкъ. Эсгерилген программа 2024-нчю йылда толу кюйде яшавгъа чыгъарылып битежек деп гёз алгъа тутула, – деп билдирди ол.

Дагъыстанны билим беривге ва илмугъа къарайгъан­ министри Ягьия Бучаев оьзю­ню сёйлевюнде бугюнлеге ерли охув ожакъларында юрюлеген гьаракатны гёзден гечирип, ювукъ вакътиде этилмеге тюшеген ишлени де белгиледи. Ону сёзлерине гёре, бизин республиканы районларында ва шагьарларында оьтген йылда 5 927 яшгъа гьалиги талаплагъа жавап береген кюйде билим алмагъа имканлыкълар яратылгъан. 19 школаны, олай да школа чагъына етишмеген        5149 гиччипавну къабул эт­ме­ге мекенлм онгайлыкъла­ры булангъы 39 яшлар ба­ву пай­­­­да­ландырывгъа берилген.  

ДР-ни Халкъ Жыйыныны билим беривге ва илмугъа къарайгъан комитетини ёлбашчысы Елена Павлюченко оьзюню сёйлевюнде муаллимлик касбуну абурун-сыйын­ артдырмагъа тюшегени гьакъда айтды.

Оьтгерилген генгешде ай­рыча пагьмулу яшланы ара­гъа чыгъарывгъа ва оланы якълав масъаласына да къаралды. Бизин республикада яшланы ва жагьиллени бажарывлугъун ва пагьму даражасын оьсдюрювге къарайгъан «Альтаир» ва «Сириус» деген центрланы къуллукъчулары шо ишни аслам пайын кютегени гьакъында айтылды.

Ахырда билим беривде ва торайып гелеген яш нас­луну тарбиялавда мекенли оьрлюк­леге етишген муаллимлеге «ДР-ни ат къазангъан муаллими» деген атлар берилегенин исбатлайгъан шагьатнамалар тапшурулду. Оланы бирлерине «Къайратлы загьматы учун» деген медаллар берилди.

 

Н. БАЙБОЛАТОВ.