Белгили болгъан кююнде, яшаву ва экономикасы алгъа гетген пачалыкъларда ва регионларда туризмни имканлыкъларын асувлу кюйде къоллавдан гьар тюрлю бюджетлеге лайыкълы къошум болдурулагъаны аян. Муна шо саялы да, Россияны Президенти Владимир Путин гьали гьалилерде РФ-ни Федерал Жыйынына Чакъырыв кагъызында Россияда ич туризмни оьсдюрювню гьакъында айрыча хат булан эсгерегени негьакъ тюгюл.

Айтмагъа сюегеним, бизин республикабызда да шолай гелимли тармакъны оьсдюрювден хантав къалмагъа ярамай. Уьстевюне, Владимир Путинни Чакъырыв кагъызында да эсгерилген кююнде, Россияда ич туризмни имканлыкъларын асувлу пайдаландырывгъа намуслу кюйде янашагъан хас къурумлар ва шолар булан бирче ич туризмни имканлыкъларындан пайдаланма муштарлы ватандашларыбызгъа пачалыкъны янындан этилинеген харжланы гьисапгъа алып, 20 проценти къайтарыш этилежек.

Шону булан янаша, Чакъырыв кагъызда бизин республикабызда ва оьзге регионларда ял алмагъа гелеген туристлени талапларын гьисапгъа алып, яратылынагъан онгайлыкълары, къуллукълары учун да пачалыкъны янындан гьар тюрлю оьлчевде субсидиялар тёленежеги гележек учун инамлыкъны тувдура.

Гьалиги заманда айлана якъда туризмни бар имканлыкъларын пайдаландырывгъа коронавирус аврувну яйылыву бир къадар четимликлер тувдурмай къоймай. Шогъар да къарамайлы, оьтген йыл Дагъыстанда 800 мингден де кёп къадарда туристлер ял алгъаны ва савлугъун беклешдиргени гьакъда айрыча эсгермеге тюше.

Уьстде де эсгерилген кююнде, Дагъыстанда ял алмагъа ва савлугъун беклешдирмеге гелеген туристлер учун гьар тюрлю онгайлыкъланы ва къуллукъланы болдурув – агьамиятлы масъала. Шону учун «Дагъыстанны 100 аламаты» деген ат берилип токъташдырылгъан турист маршрутлагъа гёре ва оьзге бойларда бугюнлерде гьар тюрлю онгайлыкъланы болдурмакъ муратда чаралар гёрюле.

 

Эмин Мерданов, Дагъыстанны туризм ва халкъ саниятларыны министри.