Оьтген йыл Дагъыстанда онгайлы шагьар шартлар учун федерал оьлчевде къабул этилинип пайдаландырывгъа берилген эки де милли проектни ичинде белгиленген борч­ланы яшавгъа чыгъарывгъа бакъдырылгъан гьаракатны натижалары яман болмады. Дагъы да аянлашдырып айтгъанда, бизин республикабызны 48 муниципал къурулувларында 223 территорияда 81 абзарда ва 142 жамият агьамияты булангъы ерлерде ярашдырыв ва янгыртыв къурулуш ишлер оьтгерилди.

Бу йылгъа да дагъыстанлылар яшайгъан шагьарларда ва юртларда онгайлы яшавлукъ шартланы къолайлашдырывгъа байлавлу болуп белгиленген борч­ланы яшавгъа чыгъарыв давам этилине. Шону учун шагьарлыланы ва юртлуланы яшавлукъ масъалаларын ёрукълашдырывгъа байлавлу болуп Интернетни имканлыкъларын къоллап, Бютюнроссия тавуш берив апрелни 15-нден май айны 30-на ерли юрюлюп туражакъ.

Шо гьакъда «Дагъыстан» деген маълумат агентлигинде болгъан прес-конференцияда ДР-ни къурулуш, архитектура ва яшавлукъ-коммунал хозяйство министри Артур Сулейманов регионну журналистлерине берилген баянлыгъында да айрыча эсгерди.

– Гьалиге ерли шолай тавуш беривде 80 мингге ювукъ дагъыс­танлылар ортакъчы­лыкъ этген, – деди Артур Су­лейманов. – Шонда аслу гьалда бизин республикабызны Магьачкъала, Буйнакск, Дербент, Избербаш, Къызлар, Къызылюрт, Хасавюрт, Огни, Каспийск шагьарларындан 70-ден де кёп территориялар гёрсетилинген. Тавуш берив­де ортакъчылыкъ этмеге муштарлылар хас https://05. gorodsreda.ru бетде яда буса ерлердеги жамият гёнгюллю къурумланы вакиллерини кёмеги булан ортакъчылыкъ этмеге бола.
Белгили болгъан кюйде, бу йылгъы тавуш беривде ортакъчылыкъ этгенлени авадан пайы­ны тавушларына лайыкълы болгъан объектлер 2023-нчю йылда биринчи гезикде онгайлы яшавлукъ шартларындан таъмин этилежеклер.

2021-нчи йылда республикабызда яшайгъан ватандашлар учун 1,6 миллион адамгъа онгайлы яшавлукъ шартлары болдурулгъаны гьакъда да айрыча эсгерме тюше.

Къ. КЪАРАЕВ.
Автор чыгъаргъан сурат.