Янгы охув йылны башланыву – охувчу яшланы, оланы ата-аналарыны, муаллимлени яшавунда уллу агьвалат. Яшланы гиччилери школагъа биринчи абатларын ала, уллулары буса охувларыны ахырынчы канзисине гётериле. Шо себеп болуп, оьтгерилеген гьаракатгъа бары да школаланы педагогика коллективлери тындырыкълы гьазирлик гёре.
Къуванчлы байрам даимликге эсинде къалсын учун, Янгыкъаягентдеги орта школаны дирекциясы, муаллимлер къаст этип чалышгъаны сентябрни биринде школаны абзарында болгъан байрам шатлыкъ толу исбатлады. Юзлер булан мунда жыйылгъан охувчу яшланы, оланы ата-аналарыны алдында Къаягент муниципал къурулувуну администрациясыны, билим берив управлениесини вакиллери байрам къутлавлар булан чыгъып сёйледилер.
– Аявлу охувчулар, муаллимлер, школаны ёлбашчылары, янгы охув йылны башланывуну биринчи гюнюнде, мен сизин гьакъ юрекден къутлайман, – деди Къаягент район муниципал къурулувуну администрациясыны башчысыны заместители Г.Агьматова. – Сиз яхшы ял алып, охувдагъы янгы оьрлюклени янгы гючлер булан алмагъа башлажагъыгъызгъа бир де шекленмеймен. Бугюн башлангъан янгы охув йыл уллу уьстюнлюклени йылы болсун, гьаригизде загьматгъа янашывну, уьстюнлюклеге талпынывну артдырсын.
Къаягент район администрацияны билим берив управлениесини вакили Артур Гьасанов да оьзюню къысгъа сёйлевюнде булай деди:
–Бу къуванчлы гюн юрегимдеги лап яхшы гьислени, лап арив сёзлени сизге багъышлайман. Янгы охув йыл гелди, гюз башланды. Билимлени байрам гюню булан къутлай туруп, сизге янгы охув йылда гьаригизге оьр къыйматлар алып охумагъа, школа, район, республика конкурсланы, олимпиадаланы утмакъны ёрайман, шолай болажагъына да шекленмеймен.
Олардан сонг чыгъып сёйлеген ата-аналар яшларына билимлени байрам гюнюнде савлукъ, муаллимлеге тынгламакъны, яхшы умутларына етишмек муратда къаст этип натижалы чалышмакъны ёрадылар.
Школаны яшларыны чебер коллективи ва оланы байрам чарагъа гьазирлеген муаллимлер маъналы программасы булан жыйылгъанланы сююндюрдю.
