Алдындагъы гюн Тёбен Жюнгютей юртда эки агьвалат бирче оьтгерилди. Бир башлап ерли школаны залында Буйнакск районну муаллимлерини август айгъы генгеши болду. Адатлы гьалда шону барышында тамамлангъан охув йылны ичинде этилген ишлер гёзден гечирилди, сонг да 2021–2022-нчи охув йылгъа ишлени планлары тизилди.
Генгеш битген сонг шону ортакъчылары абзар-ягъадагъы эркин ерге жыйылдылар. Шону тёрюнде дегенлей тезде тышдан гелип чалышгъан ва ерли муаллимлени эсделигине гьюрметни бир аламатыдай исбайы памятник ясалгъан. Бу йыл Тёбен Жюнгютейдеги школагъа 165 йыл битди. Лап биринчи янгы къайдалы школаны мунда Иван Костемировский деген эл ахтарывчу ва врач ачгъан болгъан.
Бу эсделикни бет ташына биринчи орус ва ерли муаллимлени, давда ортакъчылыкъ этген педагогланы гьакъындагъы маълуматлар да язылгъан.
Буйнакск районну баш гьакими К.Изиев жыйында къутлав сёз айта туруп, бу эсделик таш сурат халкъгъа ярыкъ ва гьакъыл яягъанланы, эл учун къарны-гёнгю булан чалышагъанланы асырайгъанлыкъны гёрмекли белгиси экенни, тезде оьз эллеринден мунда гелип ерли яшлагъа билим берген 130 муаллим болгъанны эсгерди.
Дагъы да бир нече адам чыгъып сёйлеген сонг районну баш гьакими ва РФ-ни билим беривюню гьюрметли къуллукъчусу Инжили Акаева, лентаны гесип, памятникни ачдылар. Артда шо еринде хыйлы муаллимге яхшы гьаракаты саялы гьар тюрлю абурлу атлар ва савгъатлар тапшурулду.
Шатлы жыйынны аслу бёлюгю тамамлангъан сонг районну «Темирхан-Шура» деген халкъ бийив ансамбли жыйылгъанлагъа концерт де гёрсетди.
Чараны ахырында адамлар гюп-гюп болуп муаллимлени эсделик таш суратыны этек тюбюне гюл байламлар салдылар.
