Министр бир-бир кемчиликлеге тергев берди

Алдагъы гюн «Дагестанская правда» газетни редакциясында Дагъыстанны савлукъ сакълав министри Татьяна Беляева газетлени, телевидениени ва оьзге маълумат къуралланы журналистлери булан прес-конференция оьтгерди.

Шо прес-конференцияда  «Ерлердеги медицина кёмек этивню, савлукъ сакълав идараланы ишин  яхшылашдырыв» деген темагъа, онкология аврувлагъа, респуб­ликаны савлукъ сакълав гьалына, бир-бир кемчилик­леге  ва оьзге масъалалагъа байлавлу да  лакъыр юрюлдю ва гьар тюрлю соравлагъа жаваплар берилди.

–Бизде «Ерлердеги биринчи медицина кёмек этивню, савлукъ сакълавну  яхшылашдырыв» деген программа яшавгъа чыгъагъаны экинчи йыл,–деп башлады оьзюню сёйлевюн  Татьяна Беляева.

–Анализ этип къарагъанда, юрт ерлердеги савлукъ сакълав идараланы 50 процентден де кёбюсю бузукъ даражада демеге ярай. Бугюнлеге ерли юртлардагъы  фельдшер-акушер пунктланы 6 проценти ижарагъа алынгъан биналарда ерлешген. Шо программагъа гёре гьар ердеги савлукъ сакълав идаралар медицина аппаратлар, ясандырыв къураллар булан таъмин этилмеге герек. Бу йыл биз 379-дан да артыкъ ясандырыв къураллар алгъанбыз, бугюнлеге ерли шоланы 375-ден  де артыкъ кюйде  республикагъа гелтирилген,–деп билдирди министр.

–Ясандырывлардан къайры да,  аврувланы заманында медицина идаралагъа яда врачгъа етишдирмек учун санитар автотранспортлар да алынгъан,–деп сёзюн узатды Т. Беляева. –Бу йыл да шолай 91 автотранспорт гелтирдик. Ондан къайры да, программагъа гёре савлукъ сакълав учреждениелени де ремонт этмеге борчлубуз.  Гьалиге ерли ерлердеги 60 медицина идарада ремонт ишлер юрюлюп тура. Шоланы да 30-дан да кёбюсю ярашдырылып битген. Декабр айны ахырына ерли къалгъанлары да тапшурулажакъ.

«Ерлердеги биринчи медицина кёмек этивню ва савлукъ сакълавну ишин яхшылашдырывну» программасы «Земский доктор/фельдшер» программа булан да байлангъан. Шо программагъа гёре де Дагъыстанда юрт ерлерде 107 медицина касбучу ишге къуршалгъан.

–Акушер-фельдшер пунктланы ачгъанда касбучулар эслеген  кюйде, шоларда айрыча шартлар яратылгъан, адамлар да гёнгю булан заманында оьзлени де, яшларыны да  савлугъуну гьайын эте.  Ерли медицина идаралагъа аврувларын тергетмеге юрюйгенлени санаву да шайлы артгъан,–деди
Т. Беляева.

Биз, журналистлер, ­мини­стрге  дагъы да шекер, онкология, эпилепсия аврувланы да, олар оьзлеге  тийишли дарманлар алып болмайгъанны  гьакъында да соравлар бердик. Да­гъыстанны савлукъ сакълав министри бизге жаваплар къайтара туруп, гётерилген масъалалагъа байлавлу оьзюню ойларын айтды:

–Бу йыл да къошум гьисапда дарманлар булан таъмин этмеге герекли аврувлар учун гьар ерлердеги медицина учреждениелеге харж гёрсетилинди. Биз гьаман да, мисал учун, аврувлагъа тарыкълы дарман табылмаса, шону орнуна башгъа къыйы­шывлусун таклиф этебиз. Шо дарманланы да аврувлар къоллама башлагъанда, врачны тергевюнде тура. Неге тюгюл, докторлар авруйгъанлагъа дарманлар не къадар ярашагъанны билмеге тарыкъ.