Бугюнлерде миналы къарабудагъгентли Салавутдин Абузай-динович Абушев Россияны гюмрюк федерал къуллугъуну «Спортну оьсдюрювде етишген уьстюнлюклери учун» деген медалы булан савгъатлангъаны белгили болгъан.
Шо гьакъда айта туруп, ол Къарабудагъгент юртда 1993-нчю йылда тувуп оьсгени гьакъда айрыча эсгермеге тюше. Ата юртунда школаны битдирген сонг, ол оьр билимлеге ес болуп, 2015-нчи йылда Дагъыстан пачалыкъ халкъ хозяйство институтну уьстюнлю кюйде тамамлап чыкъгъан.
2018-нчи йылны башындан тутуп, Салавутдин Абушев Дагъыстанны гюмрюк къуллугъуна къарайгъан Дагъыстан бёлюгюнде гьар тюрлю жаваплы къуллукъларда ишлеп тура. Ол бугюнлеге ерли оьзюн тапшурулгъан борчларына жаваплы янашагъан бажарывлу касбучу гьисапда гёрсетгенден къайры да, спортну гьар тюрлю журалары булан да машгъул болмагъа заман таба. Артдагъы йылларда ябушувну гьар тюрлю къайдаларына айрыча тергев бере. Шо гьаракатында да мекенли оьрлюклеге етишип геле.
Ачыкълашдырып айтгъанда, 2018-нчи йылда ол ушу-саньдадан оьтгерилген Европаны чемпионатында алдынлыкъ алгъан. Ондан къайры да, ябушувну шо журасындан Россияны чемпионатларында уьч керен биринчи ерлеге лайыкълы болгъан. Шону булан бирге, ол Россияны федерал гюмрюк къуллугъуну ябушув спортгъа къарайгъан федерациясы, олай да оьзге къурумлар оьтгереген ярышларда кёп гезиклерде алдынлыкъ алып къайтгъан. Ябушувну ушу-саньда журасындан Юнус Гьюсейновну эсделигине багъышланып мердешли кюйде оьтгерилеген ярышларда да биринчи ерге лайыкълы болгъан. Ол Россияны спортуну халкъара даражалы устасы да дюр.
Торайып гелеген яш наслуну вакиллери оьзюнден уьлгю алмагъа болагъан кюйде спортда етишип гелеген оьрлюклеге касбучулар да оьр къыймат бере. Салавутдин Абушев гележекде ябушув халчада юрюлеген тогъатартывларда дагъы да тизив натижалагъа етишмеге болагъан кюйде гьюнерли спортчу экени гьакъда бир гёнгюлден айталар.
Биз де оьзюне берилген савгъат булан Салавутдин Абушевни гьакъ юрекден къутлай туруп, огъар яшавунда, оьзю кёп сююп юрютеген ишинде, спортда гележекде дагъы да уьстюнлюклер ёрайбыз. Тувуп оьсген ата юрту Къарабудагъгентни атын данггъа чыгъармагъа болагъан кюйде ол къасткъылажагъына да умут эте къалабыз.
