24-нчю майда «Россия – мени тарихим» деген паркда Россияны журналистлерини союзуну, Дагъыстанны маълумат ва печат агентлигини сиптечилиги булан «Инфорум» деген маълумат форум оьтгерилди. Форумну ишинде Дагъыстанны Гьукуматыны Председателини орунбасары Рамазан Жафаров, Россияны журналистлерини союзуну председатели Владимир Соловьёв ва республиканы журналистлери, прес-къуллукъчулары ортакъчылыкъ этдилер.
Жыйынны башында Р. Жафаров республика газетлени къуллукъчу-ларына «Дагъыстанны ат къазангъан журналисти» деген атлар берилгенлеге шагьатнамалар тапшурду.
Форумда аслу гьалда яшавлукъ торунда маълумат къураллар не масъалалагъа тергев берме герекни гьакъында англатывлар берилди.
«Янгы медианы оьсюв ёлларыны институту» деген къурумну ёлбашчысы Мухтар Амиров белгили шаир Расул Гьамзатовгъа багъыш-лангъан «Бизин Расул» деген сайтны малим этди. Шо сайт шаирни 100 йыллыгъына багъышлангъан ва шогъар телефондан таба гирме де бола.
Хас асгер гьаракатда болгъанлар Мухтар Амиров, Исрафил Исрафилов, ТАСС-ны, НТВ ва Биринчи каналланы асгер мухбирлери Тимур Шариф, Низами Гьажибалаев, Омар Магьамматов ва Гьюсейн Гьюсейнов ишлейгенде ёлугъагъан масъалаланы гьакъында айтдылар. Сёйлевлерде яягъан ялгъан маълуматлагъа къаршы ишлер юрютме герек кюйлер де айтылды.
«Лезги газетни» баш редактору Магьаммат Ибрагьимов жыйыл-гъанлагъа милли газетлени оьсювю гьакъда сёйледи. Сёйлевлер лакъырлашыв къайдада юрюлдю, залдагъылар берген соравлагъа жаваплар къайтарылды ва ортакъчылыкъ этгенлеге пайдалы болду.
