Дагъыстан Республиканы Башчысы Сергей Меликов Россия Федерацияны Гьукуматыны Председателини заместители Александр Новак булан Москвада ёлугъув оьтгерген. Ёлугъувда гюз ва къыш айлагъа гьазирлик болдурувда яшавгъа чыгъарылмагъа тарыкълы, регионну энергетика инфраструктурасыны масъалаларына къаралгъан.
Бугюнге ерли республиканы гюз ва къыш айлагъа гьазирленивю 68 процентге етишсе де, этилме герекли ишлер де аз тюгюл. Яшавгъа чыгъарылып турагъан «Электросеть комплексни мекенлигин болдурмакъ учун» деген программагъа гёре республикадагъы 30 подстанцияны ва 54 гьава линияланы (ток теллени ва багъаналаны) ярашдырма тарыкъ. Шогъар гетежек харжны къадары 1 миллиард 87 миллион манатгъа тенг. Ёлугъувда электроэнергияны масъалалары булан бирче ягъарлыкъ газ булан таъмин этиливню масъалаларына да къаралгъан.
Магьачкъала шагьарда, Новолак, Хумторкъали районларда да елни гючюн къоллап ишлейген электростанциялар къурулажакъ. Шо ёрукъда «НоваВинд» акционер къурум булан къурулушланы инвестпроектлери гьазирленип тура. Ел электростанцияланы гючю – 315 МВт болажакъ деп гёз алгъа тутула.
Ондан къайры да, Сергей Меликов Россия Федерацияны вице-премьерине Дербент шагьарны 2025-нчи йылгъа ерли комплекс оьсювюн болдурмакъ учун гёз алгъа тутулгъан ишлени гьакъында да айтгъан.
Бирдагъы масъаланы арагъа чыгъара туруп, Сергей Меликов РФ-ни Гьукуматыны Председателини заместителине:
«Дагъыстанлыланы яшав шартларын яхшылашдырмакъ учун этилеген къайсы проектни алсакъ да, биз Россияны Гьукуматыны якълавун гьис этебиз. Сиз оьзюгюз де республиканы масъалаларыны чечиливюне байлавлу кёп къуллукъ этгенсиз, шону учун да дагъыстанлылар сизге баракалла билдире.
Биз билебиз, бугюн оьзге къыставуллу масъалалар болса да, халкъны яшав шартларын яхшылашдырыв – биринчи ерде. Оланы газ, электроэнергия, сув булан таъмин этив, о гьакъда биз сизин булан сёйледик, аслу масъала. Ондан къайры да, Дагъыстангъа инвестицияланы геливюн болдурмакъ да бизин учун бек агьамиятлы. Дагъыстанны олай имканлыкълары кёп. Шо ёлда сиз бизге кёмек этегенигиз учун да баракалла», – деп билдирген.
