Къумукъ язывчулар – Уллу Ватан давда: Ибрагьим КЕРИМОВ

Ибрагьим КЕРИМОВ 1922-нчи йылда Буйнакск районну Тёбен Жюнгютей юртунда тувгъан. 1938-нчи йылда орта школаны битдирип, юртда эки йылгъа ювукъ муаллим болуп ишлеген. 1940-нчы йылда педагогика институтгъа тюше, тек дав башлана. Гёнгюллю кюйде давгъа 1942-нчи йылны башында гете. Ол Бакуде янгы къурулгъан 10-нчу атышывчу бригаданы пулемёт ротасына йибериле.

1942-нчи йылны октябр айына бригада Туапсе шагьарны янындан таба немислени тавгъа гетме къоймай сакълай. Перевальный юртну янындагъы Кремневая деген тавну боюндагъы къыргъынлы давларда бригадагъа гюч бола. Пулемётчу Ибрагьим Керимов алгъа чаба­гъанланы сыдраларында бола, тек янбаш сюегине авур яра тие. Ол ­госпитальда ята.

Ибрагьим Керимовну «Разведкада яра тийип ята эдим…» деген шиърусу шо заманда язылгъан. Игитлиги учун ол Ватан давну I даражалы ордени ва «За боевые заслуги» деген медаль булан савгъатлангъан.
Ярасы авур экенге ону уьйге къайтара, Ибрагьим де ярты къалгъан охувун давам эте ва 1945-нчи йылда институтну битдире.

Ол ата юртунда муаллим болуп, сонг да школаны директору, 2 йыл «Ленин ёлу» газетде ишлей. Ону шиърулары ва хабарлары печат этиле.

Аспирантураны битдире ва 1953-нчю йылда филология илмуланы кандидаты бола, проза асарлар яратма башлай. Ол яшлар учун да, уллулар учун да 26 китап чыгъаргъан. Алим гьисапда школалар ва оьр охув ожакълар учун къумукъ тилни пособиелерин язгъан.

И.Керимов дагъыстан адабиятгъа этген къошуму учун «Гьюрметлев белгиси» деген орден булан савгъатлангъан. Филология илмуланы доктору, профессор, адабиятчы, тилни бек билеген Ибрагьим Керимов кёп йыллар Дагъыстан пачалыкъ педагогика институтда дарс берип ишлей.

Огъар «Дагъыстанны ат къазангъан муаллими» ва «Дагъыстан илмуну ат къазангъан чалышывчусу» деген гьюрметли атлар да берилген.

2010-нчу йылда огъар «Дагъыстанны халкъ язывчусу» деген оьр ат бериле. Ону «Магьач» ва «Терен булакъ» деген романлары ва ­«Каспийде танг къатыв» деген хабар китаплары Москвада орус тилде чыкъгъан.

Ибрагьим Керимов 2012-нчи йыл 4-нчю мартда гечинген.

Авторизация
*
*
Регистрация
*
*
*
Согласны с условиями сайта?
Генерация пароля